陳慧珊銅鑼灣實地教學

〇六年，陳慧珊同經理人鍾家鴻喺美國秘婚，〇七年，佢話咁快就懷孕兼暫停演藝工作；而囡囡鐘律然唔經唔覺已經十歲。雖然，有傳一二年佢老公宣布破產時，搞到陳慧珊要全面復出；但係事實上，佢選擇入香港大學修讀英文碩士，眨下眼，佢已經讀緊博士課程嘞，估計仲有三年時間就會完成。陳慧珊仲透露未來十年都會留喺香港，遲啲有機會希望喺教育方面做貢獻；另外，佢亦希望囡囡可以留喺香港讀書。

現年四十七歲嘅陳慧珊同東姑講：「其實我都就快五十歲，又做咗人阿媽， 已經好少角色適合我，既然機會唔搵我，我就要為自己打開另一道門。之前，我寫咗一個電影劇本，內容係我人生嘅藍本，有電影公司好鍾意，連演員我都搵咗；不過，最後因為女主角嘅身體問題，又冇諗過要換人，所以先擱置咗。 」睇嚟，佢唔太留戀幕前，並銳意轉戰幕後。

日前，東姑喺銅鑼灣撞到鍾氏一家三口，曾經話過希望囡囡可以從玩樂中學習嘅陳慧珊，呢一日，佢一路拖住囡囡行街，一路不停向囡囡解釋四周發生嘅事。唔知係咪因為太耐冇喺幕前見大家，當日佢嘅打扮土氣十足，一副細小嘅茶色眼鏡， 令佢嘅年紀，望上去大咗十年有多；再加上，一件橙色羽絨背心，形象大打折扣。不過，睇見佢拖住囡囡嘅幸福樣，一切盡在不言中。

陳慧珊拖住囡囡鍾律然，喺銅鑼灣嘅一間酒店，行嚟行去， 最後因為唔識路要詢問酒店職員。

因為陳慧珊同囡囡行得好快，緊隨其後嘅老公鍾家鴻，搞到似足一個小男人。

陳慧珊一路拖住囡囡行街，一路不停向佢解釋四周發生嘅事。

雖然陳慧珊近年嘅工作唔多，但係佢依然識歎，一家三口去咗酒店嘅頂樓望住維園景high tea。

雖然陳慧珊近年嘅工作唔多，但係佢依然識歎，一家三口去咗酒店嘅頂樓望住維園景high tea。