陳宇琛 紋身孫悟空

陳宇琛（Sam）自從約滿港視後，就自己成立咗一間製作公司，做幕後工作，又搵咗港視嘅導演、編劇、編審等埋班，用手機做拍攝器材去製作網劇。滿腹大計嘅阿Sam，已經拍咗多個故事喺手，佢就話內容以事情冥冥中要講timing為主線，圍繞周邊每人每日所發生嘅事去拍攝。

另外，阿Sam依舊仲有拍戲，早排佢就同羅家英、麥長青、楊詩敏（蝦頭）及張松枝等人，合拍電影《西謊遊記之唐僧踩錯界》。阿Sam同東姑講，今次佢身兼演員及監製，喺戲中演現代版孫悟空。日前嘅中午，東姑路過佐敦，咁啱撞正呢隻孫悟空，喺麻雀館出面同一班靚女企喺度，揸住碌矮瓜之餘，兼手指指，似係同人哋講數。《西謊遊記》玩到咁騎呢，真係想問監製阿Sam一句，咩葫蘆賣乜嘢藥呀？

現場所見，飾演孫悟空嘅阿Sam，一身紋身兼揸住碌矮瓜之餘，又手指指，似係同人哋講數，場面有啲騎呢。

當日天氣忽然驟降，操到fit爆嘅阿Sam，淨係着住件背心，反觀啲工作人員要着羽絨呀！