主頁 > 時事 > 政官莊 > 新榮記「海鮮價」收費　辣城中名人 2018 年 03 月 29 日

新榮記「海鮮價」收費　辣城中名人

香港經濟回復暢旺，市民對外出飲食嘅使費相對鬆動咗，唔少食肆甚為爆場。今年一月，灣仔開咗間新榮記，號稱係上海米芝蓮一星名店；秉承盛名，閒閒地食餐飯都要過萬蚊，食物質素OK。據聞好多高官同城中名人，包括國企高層都慕名去幫襯。只不過小編最近聽到一些有關佢哋收費海鮮價嘅事件，就覺得佢哋真係應該檢討吓。

是咁的，據說有某城中名人訂房食飯，並預訂了一條黃魚，飯店早已告之所有收費；誰知當天早上，突然話是日空運到港的黃魚比平時大條咗要加錢，有坐地起價之嫌。上到檯時，至發現魚並唔係原條上，而係斬開一嚿嚿，根本唔知條魚有幾大。另一個案，是名人訂房，慣常包房最低消費每人頭計兩千元，飯店話由於對方身份尊貴，預備了另一個更大嘅房間畀佢，不過就要位位加錢，城中名人為之氣結。

香港地寸金尺土，買樓愈大單位價錢自然愈貴，估唔到連食飯嘅房都要以尺價計算。

新榮記九五年創辦，老闆張勇係浙江台州人，今年分店開到香港。除張勇外，股東另約有十人。開業時好大陣仗，請來楊貫一、胡珠、李遠康等一班香港飲食業老闆同佢一齊切燒豬，又請食家食飯同佢做勢。飯店主打野生海鮮，話野生黃魚要成萬蚊一斤，吃一條中型體積的已要兩萬多元，開支酒又動輒十萬。

食家劉健威早前曾經在自己專欄寫過，形容佢係「上海灘餐飲奇蹟」。話佢主打嘅台州海鮮，即係「香港人心目中嘅雜魚」，「而他們更賣上頗高價錢」，話佢來香港開店要「祝佢好運」。

新榮記的天價收費在政商圈早已引起討論，而呢單名人海鮮價收費事件更是流傳廣泛，唔少人議論紛紛，話想食幾萬蚊條魚時，要打醒十二分精神，唔係入咗「水魚飯堂」都唔知。

本刊周一去搵新榮記，負責人阿Kat猛話令客人唔開心「唔好意思」，解釋鮮魚來貨重量係會有唔同，而包房食飯設唔同消費額係公司規定。至於魚塊斬開而非原條上，佢話菜式係咁設計，「如果客人有意見，我同公司反映，點樣改變以釋除客人疑慮。」本刊同時聯絡老闆張勇，截稿前未見回覆。