講到香港嘅美食，雖然種類繁多，但數代表人物，就一定有阿翁（翁仰光）份！今次「Paco巨星飯堂」，我就去到阿翁嘅主場、位於尖沙咀嘅「富豪酒家」，同阿翁及佢嘅千金Vivian（翁文敏），細說父女情。

而同阿翁因美食結緣嘅向海嵐（Anne），就同港姐「師妹」楊思琦，一同品嘗名廚主理嘅美饌，暢談食經。

因為美食，令阿翁父女同阿Anne、思琦結緣，細說食經、生活經。

二代創新

阿翁喺九六年創立富豪酒家，仲連續八年獲得米芝蓮一星評級，但係近年佢都尋求突破，所以就有大學修讀市場學嘅囡囡Vivian提供意念。「因為食中菜一向俾人嘅印象都比較舊式，所以一班friend食飯，佢哋嘅首選未必係食中菜。我就希望可以將中菜年輕化，所以有同爹哋傾，好似一啲菜式、甜品嘅製作，份量嘅多少、擺盤，都想做得後生啲。」

名廚阿翁俾人嘅印象，當然係煮盡鮑參翅肚，喺囡囡眼中又係點？Vivian表示：「爹哋煮嘢好好食，但想食佢嘅手勢，就一定要去舖頭，喺屋企佢係唔會煮嘢食，全部由媽咪出手。我鍾意食爹哋嘅脆皮魚翅雞翼，喺鮑參翅肚中，魚翅係我比較麻麻嘅食材，爹哋就諗咗呢個整法，令我鍾意多啲食魚翅。」
一道看似簡單嘅菜式，原來背後包含咗爸爸對囡囡嘅愛o架。

我去到阿翁（右二）嘅主場「富豪酒家」，喺名廚同囡囡Vivian（右一）嘅推介下，同阿Anne（左二）及思琦（左一），品嘗出色嘅中菜。

每次有阿翁擔任嘉賓，我一定有好食神，上一次同劉德華、林夕嘅飯敍，已經係十二年前嘅事，當日一樣品嘗到高水準嘅菜式。

九八年阿Anne成為四料港姐冠軍，因而與阿翁結緣，廿年以嚟都係酒家常客。

潮汕三式拼盤（$180），包括生炸活蝦棗、XO醬生曬野生魷魚及酸甜炸粿肉（後至前），一味嘗盡傳統家鄉風味。

阿翁炒花膠（$480）為阿翁特別炮製之作，以印度鰵魚膠，加入羔蟹蟹王、蟹肉及金華火腿絲，於砂鍋中同炒，火候及味道掌控都極考工夫。

脆皮魚翅雞翼（$500），於雞翼內釀入魚翅，後者吸收雞肉肉汁，外脆內juicy。

結緣廿載

有Vivian為阿翁嘅經典品牌年輕化，名廚就梗係放心；阿Anne因港姐跟阿翁結緣，仲成為餐廳常客，「九八年我成為港姐冠軍，其中一個獎品就係呢度嘅一圍酒席，我就係因為咁，做咗阿翁哥嘅粉絲，我煮嘢唔叻，但係食嘢就完全唔同，呢度好多菜式嘅水準都好高，所以如果我喺香港嘅話，好多時都會嚟食飯o架。」

無獨有偶，阿Anne最近都有一啲年輕化嘅新搞作，「我同一位珠寶設計師朋友，創立咗一個珠寶品牌，主力以翡翠去出品首飾。我哋揀翡翠嘅原因，係因為佢嘅典雅高貴，可惜佢俾人嘅感覺好古老，所以我就想將呢種原料年輕化，加入啲新式嘅設計，令人對翡翠有一個新嘅觀感。」

為亞視主持直播節目《今晚見》，阿Anne表示，可鍛煉執生技巧，獲益良多。

阿翁即場炒花膠，令阿Anne都心動，立即霸頭位學嘢。

阿Anne同友人合組珠寶品牌「Lagacy Lab」，主力設計翡翠首飾，佢仲做埋生招牌，直情係典雅嘅示範。

 

鮮果沙律金銀斑（$180），選用五至六斤黃皮老虎斑生劏，取其肉切片加上火腿片冬菰條捲成卷；另一部分班肉切球，蘸薄乾粉慢火油浸至七成熟，再用咸蛋黃蓉同炒。

陳皮金瓜泥官燕（$500），甜而不膩，啖啖清香，係清淡甜品之選。

心靈富足

事業上，思琦表示：「最近我主力喺內地登台，但如果影視製作有適合嘅角色，我梗係希望演出啦！」

囡囡卓穎啱啱六歲，思琦話自己奉行身教，「我會帶囡囡一齊去做義工，希望令佢明白，除咗大人可以幫到人，小朋友一樣可以。我帶過佢去幫一啲基層家庭，佢親眼見到嘅事物，會有更深一層嘅感受。

「至於飲食方面，多數都係婆婆（思琦母）包辦，因為要做嘢，所以我好少煮。囡囡好鍾意食蒸水蛋，我諗佢鍾意蒸蛋嘅質感。」

近來思琦主力登台搵真銀，佢話有合適嘅角色，就會繼續幕前演出。

喺教女方面，思琦奉行身教，所以佢會帶囡囡卓穎，參與義工活動。

十二頭日本奧戶網鮑（$3,300），日本奧戶是最極品的鮑魚產地之一，價格也最昂貴，現在用的都是奧戶網鮑存貨，可謂買少見少。以砂鍋將鮑魚與老雞、排骨等炆廿四小時，入口鮮甜無比，口感彈牙。

貴妃蚌雞湯豆苗（$120），清甜味美。

脆皮龜苓膏及馬蹄糕（$80），全為餐廳手工製，加上脆皮「包裝」，甚有新鮮感。

富豪酒家
地址：尖沙咀彌敦道132號Mira Place食四方4樓402號舖
電話：27362228