梁嘉琪果斷分手 男友阿金愁爆箍煲

無綫小花梁嘉琪嘅商台節目監製男友金志堅（阿金），舊年年尾開始瞞住嘉琪偷食T小姐，享齊人之福，最近更加搞到T小姐有咗餡。話明係偷食，嘉琪當然唔知情，農曆新年期間仲繼續同阿金溫馨拍拖。

不過，本刊上周獨家踢爆阿金同T小姐幽會內情後，嘉琪如夢初醒，立即寫長文公開宣布同阿金掟煲。難得嘉琪都好有修養，字裡行間並冇鬧爆男友，只係話自己一個人上路：「我還是作了一個瀟灑一點的選擇。」

搞出個大頭佛嘅阿金，日前傍晚時份收工後，一臉愁爆咁，由廣播道步行到九龍塘乘搭港鐵。一路上，佢機不離手，相信係搵嘉琪箍煲而不停發短訊；然後，佢又黯然食電子煙。喺列車上，佢仍然苦口苦面，攞住部電話係咁打，打完幾秒又打過，疑似對方嘅電話未能接通。

至於被阿金搞大個肚嘅T小姐，知情者向東姑透露，話T小姐都好慘，完全聯絡唔到阿金；不過，佢就決定會獨力養大個B，唔希望扼殺小生命嘅生存權利。

上周，睇完本刊關於阿金偷食嘅報道後，嘉琪立即以一篇長文宣布同阿金分手。

日前，宣布分手後嘅嘉琪，喺社交網貼咗一張笑到四萬咁口嘅相片，大有忘記從前，重新出發嘅姿態。

乘搭港鐵期間，阿金不停打電話疑似箍煲；不過，佢似乎連講聲「喂」嘅機會都冇。

日前傍晚時份，阿金收工離開商台，立即狂發短訊，估計係搵嘉琪認衰仔。

由廣播道行去九龍塘搭港鐵時，一臉愁爆嘅阿金不停抽電子煙。

知情者向東姑透露，T小姐決定會獨力養大個B，唔希望扼殺小生命嘅生存權利。