現年三十六歲的唐詩詠，被網民封為「不能錯過的女朋友」，偏偏情路上九曲十三彎，總是在錯的時間，遇上錯的人。上天的試煉，可能有心造就她「寶物沉歸底」；尋尋覓覓，千迴百轉，倒不如由她來親自剖白內心世界，心目中的如意郎君，需符合的五大條件。

而愛情路上，她曾經披荊斬棘過，除了滿身傷痕之外；其實，剩下更多是甜蜜美好的回憶，就由這位被評為「100分好女友」，自揭冧爆另一半的絕招秘技，讓這個冬日情人節，大家「暖」上心頭！

唐詩詠列五大擇偶條件，提出最重要是「心靈相通」， 興趣包括：鍾意睇戲、鍾意旅行、鍾意吃，還有「女神」要有feel。

哪些年，唐詩詠二十歲未夠，青澀味濃，外表「卜卜脆」。

心靈相通

唐詩詠剛奪得無綫《萬千星輝頒獎禮》的「最佳女主角」，榮升「視后」；偏偏天意愛弄人，事業最得意的一年，情場失意，去年跟拍拖兩年的洪永城「甩拖」。正如網絡潮文《有一種女朋友叫唐詩詠》：「做女人的，總會遇過錯的人，錯過後又會希望找到對的人共度餘生。」代入到唐詩詠身上，她對愛情仍然充滿盼望，而且，更加認清目標，列出五大擇偶條件，娓娓道來：「心靈相通最重要，以前可能列好多形象化條件，例如：開朗、孝順，其實心靈相通已經包括晒好多嘢，兩人相處最緊要傾到偈。」

相處時溝通良好，必須要有共同話題，唐詩詠還提出作為她男友，兩個必備條件：「一定要鍾意睇戲，雖然唔一定係行內人，但如果唔鍾意睇戲，好似同我做嘅職業距離太遠。另外，一定要鍾意旅行，起碼大家對於享受生活嘅標準都會接近。」早前，榮升蛋糕店老闆娘的她，揚言因為貪吃，所以才想將好的味道公諸同好；而作為她的好情人，最好同樣饞嘴。她笑言經常跟前度拗撬的原因，竟都與「食」有關：「我好怕決定咗啲嘢，中途改變我會好忟憎，好似明明約好食西餐，去到先話轉去第二度。同埋肚餓，我係最易會發脾氣嘅，可能遲咗去、行錯路、搵唔到、食唔到我想食嘅嘢，呢啲時候就最易鬧交喇！」

要追求唐詩詠，說易不易，說難不難，大前提亦是第五點的擇偶條件──「有feel」。「如果第一下感覺有feel係OK嘅，但如果冇（feel），佢跟住都冇機會，直情冇機會出現追求呢個過程。」她解釋：「我一發現個男仔有啲想追我，如果我唔鍾意佢，點都會喺對話中，show到大家只會係朋友，例如同佢講：『呢個女仔幾好喎！幾啱你喎！』」令對方知難而退。

對於疑似跟洪永城有復合迹象，唐詩詠回應時留有餘地，表示一切隨緣。

剝蝦殼餵「契哥」馬國明是旁人諗太多，完全冇「冧仔」之意，何況大家相識多年冇「過電」。