何雁詩東京拍拖斷正

鄭俊弘（Fred）同何雁詩（Step）呢一對，自從去年認戀拍拖之後，雙雙形象大插水。女嘅傳情緒波動搞到鎅手自殺；男嘅又話虐狗。不過，佢哋兩位當事人依然愛得癡迷迷。好似早前東姑去日本旅行，喺新宿歌舞伎町一間遊戲機中心，居然都畀東姑撞到佢哋，拍住拖去玩夾公仔。

明知道日本多香港遊客，見Fred同埋Step都好煞有介事，齊齊戴住黑色口罩遮住個樣。不過，玩起上嚟難免忘晒形，兩個只係沉醉於二人世界，對住部夾公仔機，睇準個Little Twin Stars狂夾咗個幾鐘頭，玩到似老竇姓乜都唔記得。同場仲見到有「天下第一關」之稱嘅鄭紹康，但佢兩個淨係自己顧住玩，玩到好似完全唔識人咁，睇嚟真係戀愛大過天喇！

Fred陪女友Step拍拖遊日本東京，期間狂玩夾公仔。原先，兩人都有戴口罩，但Step玩到鬆懈，口罩愈拉愈低。

兩個沉醉喺二人世界裏面，竟然冷落咗有「天下第一關」之稱嘅鄭紹康，玩到似唔識人。

佢哋瞄準一部夾公仔機夾Little Twin Stars公仔，相信係Step心頭好，而Fred為冧女友，惟有搏命夾。