視后爭逐，塵埃落定。

那一夜，當唐詩詠在掌聲中走上頒獎台，在她座位不遠處，是李司棋，最後五強不入，依然笑得從容，優雅地拍掌，目送比自己年輕三十載的詩詠，含淚接過視后獎座。

這樣的名利場盛典，李司棋早已看慣。18歲便贏得香港公主選美冠軍，58歲憑《溏心風暴》大熱贏得視后，足足比唐詩詠早十年。

今年她的《溏心風暴3》演技不比當年差，但收視難復當年勇，在頒獎禮上陪跑，其實心中有數。

都68歲了，婚離過兩次，子宮頸癌也患過，骨枯折磨七年，左耳聽力現在又失去四成。

滔滔風浪，視作身後煙雲。

如此人生，根本是一台戲。她寧可享受靜靜地做一個台下觀眾，視后之夜狂玩自拍上載Instagram ，閒時穿穿黑絲襪，走日本少女風打扮，偶爾登台唱唱〈賣湯圓〉，開心自在。

「好多人鍾意不斷向上爬爬爬，又放招財貓。其實人生有好多風景，根本睇唔切。好似我一去到絲襪出口店，就會開心到癲狂買。」別以為，她的絲襪，裝載的，一定是眼淚。

 

苦命

十年前，李司棋在台上講述視后得獎感受時，女兒子青忽然上台獻花，令她感動得紅了眼。畢竟這段母女情，曾經因為離婚，女兒跟前夫同住，而變得疏離。

「其實冇需要講到我同個女血海深仇咁。佢細個時，我好忙，係真嘅，但一得閒我就拖住佢隻手，同佢玩，陪佢傾偈，有幾差啫。」

女兒如今43歲了，離婚兩次，跟她走上同一條宿命路。

「我每次結婚，媽咪都唔鍾意個男人。到我個女識男朋友，我又係冇一次睇得合眼緣，哈哈！但呢個年代，點到你同啲後生講？只能接受，同分析俾佢聽。」

李司棋說，如果信宿命的話，她早已改名。本名李蓉，升中學後，家姐替她改名「司棋」，取材自《紅樓夢》一個打理棋房的丫鬟。

「不過呢個丫鬟最後好似吊頸死，條命好苦。」

像她一樣苦嗎？七一年和法醫官男友結婚，三年後生下女兒子青， 十五年後發現丈夫有小三，憤而離婚。

「當對方背叛你，係會好傷心，磨滅唔到。幾年前我同個女再傾過，我都係唔能夠原諒佢。」

 

女兒定居加拿大，雖不常見，感情濃濃，有愛會說出口。

情傷

愛情不如意，有人會寄情事業，她卻繼續落力追尋第二春。

「我講可能冇乜人信，我從來唔會睇人哋點樣紅過我，人哋付出多啲，攞多啲係好應該。而我，一直只想有個好好嘅家庭。」

在朋友介紹下，她遇上第二任老公。「第一次去間餐廳見面，一見到佢已暈暈哋，因為好靚仔，又着住西裝。由細到大，我好鍾意着西裝嘅男人。」

一拍即合，九二年再婚。但未過門前，奶奶勸說她：「不如你同我個仔同居先，唔好結婚住。」愛得火熱時，當然睬她都傻。

「事後才知，奶奶原來都係想我好。結婚無耐，老公經常同埋成班朋友飛來飛去，唔返屋企，年三十晚居然可以打電話俾我：「我喺廣州行緊花市啊！」你叫我咁強嘅一個女人，呆坐喺屋企等你門，點得呢？」

得不到期望中拉埋天窗的溫馨，嫁錯了一隻沒有腳的雀仔，婚後不到兩年，李司棋執拾行李搬走。

兩度離婚後都已50歲了，從此她選擇一個人活下去。

「唔想再搵個伴咯，如果傾得埋，只做好朋友就算啦。但如果要返屋企閂埋門過人世，咪搞！我年紀一路大，仲可以有幾多年一齊呀？唔通你提我去覆診，我提你食藥咩，開心唔夠十年八年，隨時其中一個又會走先，到時嘅單身生活，會好大打擊，又要重新適應。」

18歲得選美冠軍，樣靚身材正。