黎瑞恩單親女人當自強

現年四十四歲嘅黎瑞恩（小恩子），嚟緊復活節會上紅館開演唱會，不過之前佢身體唔多舒服，先係入院切除腹部腫瘤，之後又感冒，發現聲帶原來穿咗個細窿。雖然都冇乜大礙，但係小病好似夾埋一齊嚟，仲要喺開騷前備戰呢段關鍵時間，都咪話唔「濕滯」。

早前，東姑喺沙田一間大型家品店遇見小恩子，見佢約埋兩個女性朋友shopping；而佢全程仲戴住口罩，唔知係唔想人認得，定係感冒未清？幾個人專注揀選地氈，同埋燈飾等嘅家品，好明顯係小恩子買嘢，而兩個朋友就純粹做陪客。現場所見，兩個朋友不時幫下眼，同埋畀吓小恩子意見咁，不停指手劃腳吱吱斟。話晒電燈呢啲事項，不嬲應該係由男人負責，冇男人就惟有三個女人一個墟有商有量，希望三個臭皮匠當一個諸葛亮囉。

其實，自從一四年，小恩子同前夫金利來太子爺曾智明離婚之後，佢同一對仔女搬離曾家大宅，三母子搬咗入大埔住，單親媽媽要照顧一頭家，認真唔容易。難為佢應付開騷，病完又要忙屋企嘢，公私兩忙咁多嘢兼顧，都仲態度正面同埋積極，所以女人真係唔好睇小，尤其係做人阿媽嘅女人。為咗照顧仔女，可以激發佢哋無窮嘅「小宇宙」，母愛真係超偉大！

向來女人對電器都不太在行，冇男人照顧嘅小恩子，惟有搵埋兩個女性朋友陪買。

東姑見佢喺燈飾部來來回回選購，似乎毫冇頭緒，後來仲猛傾住電話求救，相信係致電請教朋友。

小恩子幾個女人仔有商有量，唔識再詢問店員，行咗幾個鐘，最終都落單買到貨。

戴住口罩行家品店嘅小恩子，可能係唔想人認得佢；不過，偶然又見佢用手指公捽頭，唔通早前嘅感冒仲未好番？

離婚之後，十四歲大女凱栭，同十三歲囝囝浩儒，交由媽媽小恩子撫養照顧。

早前，小恩子喺社交網自爆入院做切除腹部腫瘤嘅手術，睇佢擘大眼、擘大口扮驚，其實係專登搞笑，唔想屋企人同粉絲擔心啫。