周庭被DQ 姚松炎獲放生 補選戰風雲色變
三月舉行的立法會補選爆「入閘戰」，香港眾志周庭被DQ後，各界焦點都放喺危危乎嘅姚松炎身上，但事態峰迴路轉，本周一政府宣布姚松炎參選資格有效。姚松炎去年就職宣誓無效，被取消議員資格，根據人大釋法「不得重新安排宣誓」，據悉政府內部反覆研究法律依據，認為「不得重新宣誓」嘅意思係指同一次選舉，姚參與補選，則屬另一次選舉，裁定他參選有效。
「入閘戰」塵埃落定，民主黨前黨員區諾軒將頂替周庭出選港島，與新民黨陳家珮及自稱獨立人士任亮憲爭過。有分析認為，今次DQ餘波唔細，或激發泛民選民更踴躍投票，催谷區諾軒嘅選情。
香港研究協會一月初嘅民調顯示，陳家珮及周庭叮噹馬頭，都有約兩成支持。o依家周庭被DQ，換來區諾軒，有政界人士分析建制呢場仗更難打，「港島以中產選民為主，本來對周庭嘅反應一般，陳家珮勝出機會係五五波；但o依家換咗區諾軒，佢係南區票王，有一定支持者。」
論「牌面」的確對泛民有利，根據一六年立法會港島區選舉，建制與泛民（計埋本土派）得票率分別係三成九及四成八，只要集中票源，泛民要搶一席絕非難事。但前提係泛民要夠團結，政界人士提醒大家唔好唔記得，前社民連成員任亮憲都參選，或分薄票源，「如果大家攬炒，咁就真係泛民自己玩死自己，令陳家珮收漁人之利。」
至於九西，除咗姚松炎，民建聯鄭泳舜及報稱獨立嘅前青年民建聯成員、物理治療師蔡東洲報名參選，以及做後備的民主黨袁海文最後關頭棄選。不過，政治嘅嘢話唔埋，未到最後一刻都唔知，泛民內部會唔會爆內鬨影響姚松炎選情。
咁周庭係咪玩完？基本法委員會委員、港大法律學系教授陳弘毅話，佢嘅情況同一六年「香港民族黨」陳浩天DQ案類似，當年陳浩天有提出選舉呈請，但搞到選舉完咗、去年先審理完，陳弘毅相信就算周庭上訴，都只會步陳浩天後塵；香港眾志亦會與「香港民族黨」同一命運，因提倡「自決」難有成員入閘參選。
周庭（前中）及姚松炎（前右）報名參選立法會補選，但兩人命運各異，前者被DQ，後者絕處逢生。
區諾軒將頂替周庭出戰港島補選，有分析認為牌面佢較着數，但前提係泛民團結一致，佢係民主黨眼中「叛徒」，該黨會否支持係未知數。
香港眾志曾參與不少運動宣揚自決，去年國家主席習近平訪港前，成員有份佔領灣仔金紫荊廣場。
