衰衰格格

早前有一宗傷人案，被告是法律系畢業生，和女友發生爭執，將她推倒地上，又扯頭髮，掟爛她的手機。被告辯稱當晚飲了威士忌，在酒精影響下才犯案。

裁判官斥責被告：「你讀咁多書，廢嘅！格衰，讀幾多書都冇用！」

說得好！絕對是待人接物的人生金句。

一個人，如果格衰，有幾咁富貴又如何？有幾咁靚仔靚女又如何？有幾咁高學歷又如何？有幾咁紅又如何？

都是廢的！

最近我的同事訪問一位女藝人，便親身體會到，格衰的人，是甚麼嘴臉？

訪問前幾天，女藝人要求先過目借了甚麼服裝給她穿，同事把每一件衫逐一拍照，透過宣傳人員轉交女藝人，幾天來都沒有傳來負面的回應，一切便go on !

到訪問當天，女藝人拿起所有借來的贊助服裝審視，一臉不屑說：「除咗呢件衫，其他衫都無件得，我只會着呢件衫影相咋！」

她轉身走入更衣室，換上心儀的那件衫，開始訪問。

答問題時，態度敷衍，沒有內心世界，沒有真情流露，「我和同片演員合作得好愉快……」短短25分鐘的訪問連影相時間，轉眼便過。

到底這篇訪問，夠料成稿嗎？當這個問號，仍在同事的頭上搖晃，女藝人馬上送上另一個難題。

「呢件衫我好鍾意，你叫間贊助公司送咗俾我！我唔除落嚟嘞！」女藝人不是請求，是命令。

「吓？不如等我打電話幫你deal吓先。」同事為難地說。

「唔係deal我，係你deal佢哋呀！」女藝人用對待下人的態度說。

贊助公司回覆同事，那件原價約四千元的衫，因為只得一件，不能送，但可以半價賣給女藝人。

女藝人得悉未能免費獲贈靚衫，即黑口黑面衝入更衣室脫下，然後氣沖沖走出來，把那件衫怒擲到同事手上，並發火大駡：「o依家我唔要呀！你同間公司講，佢試吓將件衫賣俾第二個，我一定告到佢甩褲，要佢賠番二十萬俾我。」

吓吓吓？不肯俾錢，卻反恐嚇索償，她憑甚麼叫人賠錢呢？即使新年收陀地，那些小混混至少也會捧一盤桔到商舖，說一句「恭喜發財」吖！

格衰的人，上天一定會好好招呼，等着瞧！