鄭子誠一副戇夫樣

有「完美奸人」稱號嘅鄭子誠，由《真情》嘅子浩、《封神榜》嘅紂王，到《超時空男臣》嘅張誠，做奸人做到入晒屋，奸足廿幾年，但凡佢嘅一切都同奸、陰謀扯上關係。

查實，鄭子誠初入TVB時係做主持，唔知大家仲記唔記得呢？佢曾經同東姑憶起往事：「廿幾年前嘅事喇，當時我本身做緊《城市追擊》突發主持，採訪鄧家爭產案，但我永遠唔夠啲娛記跑得快，永遠都問唔到獨家嘢。當時，《真情》監製搵我做一個來自大陸嘅戇直青年；但佢之後又同我講，你做呢個角色永遠唔夠搶，不如咁啦，將個性格扭一扭，結果我個角色，由力爭上游變咗不擇手段。」一代奸人就係咁煉成。

日前，東姑喺天后就見到「奸人」鄭子誠；當日，孭住背囊嘅佢，剛剛喺維園打完網球，立即急急腳、乖乖咁返屋企慰妻。睇嚟，現實生活嘅佢，既鍾意做運動，又愛回家錫妻，完全係一副戇夫樣，除非佢深藏不露啫。

曾經有監製話鄭子誠眉宇間帶點奸意，但係東姑見到鏡頭下嘅佢，其實個樣戇戇直直。

平日，鄭子誠最大嘅嗜好就係打網球，呢日佢打完網球就急急腳、乖乖咁返屋企慰妻。

劉倩怡係鄭子誠嘅第二任太太，兩人同係電台DJ又係教徒，結婚十四年，恩愛如昔。