「學徒老總」的贈興哲學

機會是留給有準備的人，這道理放在人稱「學徒老總」的周大福（01929）董事總經理黃紹基（基哥，下圖）身上可以說非常貼切。

當年香港只得極少數中學生可以向上流，基哥考了幾次會考都入唔到大學，只得出來工作。佢英文好，做藥廠銷售員人工有千幾蚊，在當年算唔錯，佢好快掌握到銷售技巧；不過做了一段時間，覺得做來做去都一樣，諗到成世做呢行發展機會不多。某日睇報紙見到周大福請練習生，佢唔知係乜工作，但印象中行過中環舖頭見到門面靚又大，佢又鍾意設計，於是去試試。

所謂練習生其實係大打雜，坐鎮舖面的都是招呼貴客的大師傅，二十歲嘅佢全舖最後生，坐喺最後面，每日工作係眼望四周耳聽八方，看哪裏需要斟茶遞水，哪個師傅需要開單，跑銀行入票，晚上還要在舖頭留宿，早上開店前把櫥窗擦得光亮，「唔會有人話畀你聽做乜，總之見到哪個師傅要幫忙就自動行埋去。」日子有功，有些師傅見佢肯搏肯捱，至畀佢坐佢身邊睇，學習如何Sell客，呢段日子佢話畢生受用，「觀察師傅點樣跟客人傾偈，點樣銷售，有咩禁忌……」例如切忌多嘴，同客人講「呀你上次買咗乜乜物物……個客未必想人知，或者佢唔止一個女朋友……」

有時遇到不是很熟的大客，開出支票要搵人第一時間跑附近銀行入數確認，這段期間師傅如何在不得失大客嘅情況下繼續同佢天南地北吹水，直至肯定收妥筆錢為止。這種另類拉布，少點功力也不行。

基哥做徒弟仔做了好一段日子，後來又學埋點樣入貨和營運，直至八八、八九年左右機會終於來臨。那時周大福不斷擴充，需要能由舖面到入貨到價錢控制乜都識的通才，基哥被點中去做旺角分行經理，也是開荒牛。

旺角和中環很不同，後者出入的多數是上流人士，而旺角則較龍蛇混雜，品味亦有不同，基哥卻將中環Feel帶到旺角，主銷貴價高級首飾，結果很受歡迎。

基哥七七年入行，在珠寶業已有四十年功力，呢位「學徒老總」由斟茶學起，到原材料處理、設計，加埋市場推廣和企業管理，到今日喺周大福獨當一面。佢當年減一半人工都要入行，證明搵一份有發揮的工作，重要過一時三刻的薪高糧準，而那年代只要肯做，機會到處都有，「咁多年學到最重要嘅智慧，係來買珠寶的都是開心的，所以我哋都會贈興一下，令佢更開心消費。」佢話最近做成一單生意，有個客買了百萬元珠寶送贈愛妻作結婚周年紀念禮物，佢哋替客人設計埋一餐晚飯，成件事即時更加浪漫。

說回今年市道，基哥話零售平穩復甦，佢哋也受惠。睇番十一月周大福公布嘅中期業績已見報喜，上半財年多賺四成幾至十七點八億元，內地及港澳同店銷售雙雙錄得約百分之十正增長，相信佢都可以過個安樂年。