點睇都入!點會唔入?
世界盃專欄出到第3期,期期大point都關英格蘭事,知道你想睇嘛!Oh!係,同時亦都要承認《東周刊》內部有多位英格蘭躉,所以在公在私,都要豪多次!
況且周日晚(27日)嘅英德大戰,有件廢拉柴烏拉圭球證拿尼安達(Jorge Larrionda)變埋發雞盲,判英格蘭林伯特入晒白界嘅「入球」唔入,幫手造就德國大炒英格蘭,咁搞法,唔講英格蘭點得?Last一次,下屆巴西見!
前面嚟個top angle睇,入晒!德國件門神紐亞擰轉頭望,點都係最近嗰位見證呢個歷史時刻,之但係畀着我係佢,梗係話乜都睇唔到啦!
後面水平線咁睇,成個波又係過晒條白界,球證睇唔到,阿旁證艾斯賓奴沙應該冇理由走漏眼,呢嘢令講波嘅潘源良嗌爆咪,眾fans「fxxk」聲震天,勁過黃永!
Well,有網友條氣頂住,發揮無限創意,話拿尼安達一出球場就被槍擊。
抗議無效慘過國殤
話得你愛睇,怕且唔使我多講你都知英格蘭本身已經表現不濟,唔使30分鐘落後0:2,追番球之後,「林伯」喺上半場39分鐘bend咗個撞楣波,入晒白界,電光火石間,球證拿尼安達睇唔到,fine!佢烏拉圭嘅同鄉旁證艾斯賓奴沙(Mauricio Espinosa),一樣超錯地睇唔鬼到。明明入晒都畀人當唔入,你噓我噓,喺球場上嘅朗尼、碧咸就輪住向旁證抗議,唔使問你都知冇效啦!唔係下半場焗攻嘅英格蘭又點會返唔切後防,令德國任爆任入呢?
你睇到「林伯」(左)的樣子嘛?對住電視機鬧爆嘅你咪又係咁。
順便話你知,上半場一完,facebook嗰啲status update全插兩件球證;下半場完埋,已經有英格蘭fans喺網上吹雞嗌晒要隊冧球證,又有網友發放拿尼安達一出布隆方丹自由州球場,就畀英格蘭fans槍擊身亡嘅流料,激過齋插。最冷靜嗰個,係好有可能唔使撈嘅英格蘭教練卡比路,佢話喎,「我都唔明點解唔用電子技術,如果相關技術引入嘅話,我哋就唔使拗嗰球有冇入啦!而球證睇唔到,我亦相當失望!」
另一邊廂,見到個波入晒嘅德國門神紐亞(Manuel Neuer)梗係聲都唔聲,賽後至話:「我好驚球證睇到個波過咗白界成兩米㗎,所以咪扮鎮定繼續比賽囉!」仲奸詐過夜晚重播《天地豪情》嘅甘量宏呀!
出聲嘅仲有德國足總主席史雲斯加(Theo Zwanziger)同教練路維都話:「係,個波已經過晒白界,我對英格蘭fans嘅感覺,感同身受。」嘩!幾「窩心」都有呀真係!
唔只喺電視機前嘅你同我、講緊波嘅潘源良,連落場踢嘅朗尼(上圖)、仲有喺場邊「打氣」嘅碧咸(下圖),半場都係「啫」住旁證艾斯賓奴沙(小圖)。
碧咸(中)打氣之餘,仲嘈埋旁證一份,啱㗎嘞,佢冇咩其他嘢做到㗎嘞!
WAGs出動於事無補
講起卡比路,點都要提吓佢放寬英格蘭WAGs(Wives and girlfriends)觀戰嘅「政策」,嚴格嚟講,又唔可以話係教練主動鬆綁,係一眾阿嫂掛住honey,逐批飛去南非撐場。講到係英德大戰嘞喎,阿嫂團就梗係墟冚啦,「林伯」新女畢琦莉(Christine Bleakley)、泰利嫂托妮(Toni Poole)到齊,落場得嗰11個,唔係鬥人多,阿嫂出席打氣,卒之咪又係一肚氣。
有女遠道撐場,「林伯」只係食咗鋪唔係詐糊嘅詐糊,輸咗都好,唔使嘥阿嫂!
有人話做演員嘅「林太」畢琦莉隆胸升cup,well,佢包到咁冚睇波social(左圖),仲難判斷過前面個球,睇吓右邊,都誇唔過佢棚牙啫!
同偷食泰利重修舊好嘅托妮,帶埋阿女捧honey場,咪又係唔掂!
盲炳球證出事連連
呢位拿尼安達,本來出名鍾意畀牌,你睇佢嚟自烏拉圭都知佢幾有料,話就話佢98年已經開始喺國際賽事執法,但係02年佢本來有份吹世界盃賽事,就係因為烏拉圭足總見佢個黑哨底厚,唔鬼畀佢吹,搞到佢「停賽」兼冇得飛,幾黑暗都有。
講近啲,舊年洲際國家盃,拿尼安達又無端白事直接紅牌趕咗美國嘅米高班特利出場,搞到人哋無得踢決賽。
講今屆世界盃,拿尼安達(右)已經睇唔到卡希爾(左)手球「幫」咗澳洲贏塞爾維亞,今次「幫」埋德國,下一round有70%冇佢份,唔係因為英格蘭,只係南美球隊多咋!
英格蘭躉微博出氣
英格蘭躉為數湧得死球證拿尼安達,係咁意計就有李克勤夫婦、蔡少芬等人,個個喺微博喪插球證㗎!