有「凍齡美魔女」之稱的趙雅芝，剛於日前過了六十三歲生日，駐顏有術的她，身材fit到漏。早前，她參加內地的真人騷節目《偶像來了》，跟劉嘉玲同場，兩「女神」各具美態，平分秋色。

日前，趙雅芝聯同老公黃錦燊和兒子黃愷傑，一連兩日穿梭中港兩地拍廣告，雖然舟車勞頓，但依然狀態十足，她更大方分享其駐顏心得，強調湯水好重要。

趙雅芝聯同老公黃錦燊和阿仔黃愷傑，齊齊上陣在私人飛機上拍廣告。剛於本月十五日六十三歲生日的她，多年來保持皮膚白滑，身形窕窈，絕對是逆齡有法。

做番自己

上周，趙雅芝連踩兩日為代言的「景鴻環球集團有限公司」拍攝新一輯廣告，同場還有老公黃錦燊和兒子黃愷傑。據知，趙雅芝是第十年跟該公司合作，故老闆關景鴻不但加酬勞，更揼本加碼製作費，繼租用私人飛機在深圳機場拍攝外，翌日又包下尖沙咀五星級酒店的總統套房，整個製作費高達千萬。

當日，趙雅芝一家三口由早上拍至黃昏日落，劇情講述他們對生活的策劃及實現夢想。現場所見，三人戲內外都是一家人，所以一埋位拍攝，他們即自動波畀反應，默契十足。趙雅芝說︰「有老公同阿仔一齊工作，好自然、好真實，因為有啲戲冇對白，只係用眼神交流，我哋一做就做到，少好多NG。（同阿仔合作，感覺如何？）以前細個，我照顧佢；o依家調番轉，好似拍外景時大風，佢就除外套畀我，到佢照顧番我。」

在廣告內，他們同樣是演繹一家人，因為大家舉手投足都充滿默契，所以拍攝往往一take過。

逆齡有法

趙雅芝透露現時主力在內地工作，主打拍廣告和商演；至於拍劇，她坦言︰「冇時間呀！除非個劇本好吸引，最多只會客串。其實，我之前都參與咗真人騷，畀我試咗好多嘢，去咗唔同嘅地方，幾好玩，我哋仲開咗個群組，保持聯絡添。」

現年六十三歲的她，容顏和身形都保養得宜，看似四十多歲，逆齡有法，原來是靠「內外兼備」。她分享說︰「我主要注重平衡生活，定時飲食同作息，以及保持年輕嘅心態。我好享受同家人喺一齊嘅時光，會令我心情好。另外，我對食方面唔挑剔，鍾意少油少肉多菜。湯水係必備，魚湯、雞湯同素菜湯要每餐飲，滋陰養顏，紅肉嘅湯就少飲。不過，間中我會煮吓牛肉麵，因為女人都要補鐵質補血。至於運動，我鍾意跑步、騎馬，平時最多做嘅係瑜伽，最緊要關節和骨骼健康，令我身形時刻保持筆挺，即使經常穿着高跟鞋，亦能輕鬆自若，感覺年輕。」

趙雅芝與廣告商踏入第十年合作，第四度續約，是次一家三口落場拍攝，關老闆（右二）笑言已識做地增加薪酬。