補選「前哨戰」開打 建制泛民區選各取一席
原任中西區區議員嘅陳浩濂及蕭嘉怡早前獲邀加入政府，分別出任副局長及政助，佢哋騰出嘅山頂及東華選區喺周日舉行補選。呢兩個原本屬於建制嘅議席，經過一輪激烈混戰，最後由建制及泛民各得一席，分別由民主黨伍凱欣及自由黨楊哲安當選。
有學者認為，今次區議會補選係明年立法會補選嘅前哨戰，可以測試選民嘅投票取向。今次兩區嘅投票率都不足四成，比一五年區選為低，低投票率傳統上對泛民不利，但泛民今次仍能從建制手中取得一席，顯示泛民嘅動員力不容忽視，建制陣營喺明年立法會補選必需加把勁才有望突圍。
今次雖然建制派畀泛民搶走一席，但建制陣營喺中西區區議會嘅議席仍能保持三分二，學者相信中西區區議會整體形勢仍維持原狀。
被形容為自由黨地盤嘅山頂選區，全日有一千七百八十名選民投票，投票率逾三成三，比一五年嘅逾四成為低。最後，做過教育局政助嘅自由黨候選人楊哲安以一千三百七十八票，力壓得到三百九十四票嘅民主派對手錢志健。錢志健表示雖敗猶榮，因為民主派喺呢區嘅得票已較一五年多咗七十七票。
楊哲安喺一五年都參加過南區薄扶林區選，最後敗喺民主派司馬文手下，今次佢轉戰山頂補選，主打民生牌，最關心區內塞車和違例泊車問題。
佢話今次喺山頂拉票，心理壓力好大，事關「山頂嘅朋友」唔少係自由黨元老，例如該黨榮譽主席田北俊就係住呢區，田少出入山頂都會「飭更」，睇下佢有無勤力企街站拉票。除咗心理壓力，雙腳壓力更大，因為山頂出名「長命斜」多，走上走落雙腳痠軟，佢就諗到一種方法減壓，「喺面褲入面着多一條壓力褲，隻腳無咁痠痛，企得耐啲。」佢就係咁全程着住兩條褲拉票。
而東華選區嘅選戰可謂鬥得火熱，未正式投票，三名候選人伍凱欣、被指與建制關係密切嘅新會商會學校校長呂錦強，以及自稱獨立嘅劉舒燕，一度互相投訴被人抹黑。呂錦強更報警及向選管會投訴，指其宣傳品被人用海報遮住，而該海報寫有佢指使另一名候選人劉舒燕「鎅」走伍凱欣票源，警方將案件列作雜項事件處理。那邊廂嘅伍凱欣陣營，亦投訴宣傳橫額被人剪爛遺棄喺附近山坡。
最後，呢場火藥味濃嘅選舉，喺午夜後分出勝負，全日有一千九百七十三名選民投票，投票率近三成九，比一五年區選嘅四成六為低，伍凱欣奪得一千○三十四票，撼低獲九百○九票嘅呂錦強，以及僅得廿票嘅劉舒燕。
呢區議席原本係屬於民建聯蕭嘉怡，佢一五年獲一千三百五十二張當選，今次補選顯示，雖然建制派落力為獨立嘅呂錦強站台，但呂錦強仍未能全面承繼民建聯嘅票源，相反民主黨嘅票源就較一五年增長五十四票。
伍凱欣知道結果後，與戰友相擁而泣，佢多謝選民支持，「相信選民今次唔單止係支持我，都係支持民主黨長期喺呢區嘅服務。」落敗嘅呂錦強校長未有氣餒，佢表示已盡咗全力，相信自己係輸喺經驗上，「會收拾心情，專注做番學校工作，依家最想好好瞓一覺。」
楊哲安（右）高票當選後，興奮地與妻子張燊悅擁吻慶祝。
伍凱欣（右）喺一班民主黨元老簇擁下，到酒樓拉票。
原任中西區區議員嘅陳浩濂及蕭嘉怡早前獲邀加入政府，佢哋騰出嘅山頂及東華選區喺周日舉行補選。
楊哲安嘅選舉團隊好落力拉票，企晒喺安全島高舉標語，叫路過嘅車主投神聖一票。
山頂有唔少自由黨元老居住，田大少（左）係其中一人，楊哲安話喺呢區出選好有心理壓力。
