歐陽震華拍完長劇一身鬆晒

歐陽震華（Bobby）嘅成名作《壹號皇庭》系列o依家凌晨重播，東姑晚晚都有追住睇；另外，今個禮拜，Bobby擔正嘅五十集台慶劇《誇世代》又播喇，真係令東姑相當期待。

話說Bobby拍呢套劇時都幾辛苦，試過中暑暈低，又試過因為抵抗力差，眼睛發炎而停工兩日，拍足大半年終於捱到煞科，以佢五十七歲嘅年紀，加埋一三年急性肺炎入院命懸一線，佢拍《誇世代》咁搏命法，冇事真係福大命大，還得神落喇！

早前，東姑喺跑馬地遇到佢，呢輪唔使開工放緊長假，成個人當堂輕鬆晒，睇佢個樣精神爽利，老虎都打死兩隻。東姑又見佢揸住架白色辣Jeep，先去銀行撳機，之後再去咗一間馳名小店歎番碗魚蛋河，雖然食麵時仲戴住副黑超，但係佢勁nice，一邊食一邊仲同舖頭夥記，打晒牙骹，睇嚟佢吹水都好得吓。除咗一支公悠悠閒歎魚蛋粉，佢呢排亦終於多番時間陪老婆Rosanna補番數，兩個周不時網上晒恩愛，so sweet！

拍完五十集長劇《跨世代》，放緊長假嘅Bobby成個人爽晒，連行步路都輕盈過人。

Bobby喺跑馬地一間馳名粉麵舖，歎魚蛋粉，食到咪咪嘴笑，似乎好滿足；期間，仲同舖頭夥記猛吹水。

歎完魚蛋粉之後，Bobby揸番佢架型到震嘅辣Jeep，趕返屋企陪老婆。

拍完劇簡直係大解放一樣，Bobby即刻做番「廿四孝老公」，陪老婆出去同朋友chill番晚。