主頁 > 專欄 > Paco巨星飯堂 > 17解密 2017 年 10 月 28 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

17解密

外國人有「Lucky Number 7」之說，對今次「Paco巨星飯堂」嘅嘉賓at17嚟講，17先係林二汶同盧凱彤（Ellen）嘅代表性數字。呢個香港罕見嘅女子組合，即將於十二月舉行一連三場嘅演唱會，17就係推動整件事嘅密碼。

我帶兩位嘉賓，去到位於西環嘅「11 Westside」，既品嘗傳統嘅墨西哥料理，又拆解17背後嘅意思。

久違七年，at17終於重組開show，門票仲瞬間售罄，二汶

同Ellen表示，喺出道十五年嘅紀念性時刻，佢哋年尾仲有其他搞作。

分久必合

at17喺〇二年出道，七年前二汶同Ellen為咗滿足個人發展嘅夢想，決定單飛，今年係佢哋出道十五周年，所以今次嘅《Girls Girls Girls演唱會》別具意義。Ellen表示：「揀今年重組，係要攞二〇一七年嘅意頭，17嘛！雖然我哋喺〇二年出道，但其實喺〇〇年我哋已經認識，所以今年仲係我同二汶嘅相識十七年紀念。

「喺分開呢七年嚟，我哋各自做咗老闆，自己投資出唱片，對呢個行業認識都深咗，最重要係我哋都好掛住對方，o依家先真正懂得欣賞對方俾到自己嘅嘢。」

二人組成at17之時，分別得十五同十九歲，o依家兩位都已經三字頭，二汶話：「以前我以為好清楚自己做緊啲乜，原來唔係，o依家先發現，我哋其實係唔識唱一啲歌，以前嗰啲滿足感原來係假象。

「o依家我哋都upgrade到2.0，踏實咗。我相信當我哋一開口，唱出嚟嘅感覺已經完全唔同。今次我希望帶俾人一個返到屋企、但又feel到呢個屋企裝修咗嘅感覺！」
Ellen補充：「我哋兩個2.0重組，就好似變形金剛合體，一定會比以前更加好，無論係音樂製作、寫歌同live performance，都比以前更加有力量。」

我帶兩位嘉賓去到位於西環嘅「11 Westside」，既品嘗傳統嘅墨西哥菜式，又暢談音樂經。

除了12月的演唱會和新曲加精選唱片，at17目前沒有長遠的大計，但肯定的是未來她們會身兼個人及組合兩邊的發展，at17這個名字將會不定期繼續出現。

GSC（$180）為傳統墨西哥菜式，以牛油果醬和莎莎醬配上粟米脆片，醬料即叫即做，確保新鮮美味。

沿岸凱撒沙律（$128），以羅馬生菜心,、新鮮蟹肉及小紅蘿蔔，配上自家製麪包乾及巴馬臣芝士，配合蒂華納風味沙律醬汁，別有風味。

太平海鮮刺身（$118），用青檸同檸檬汁醃製刺身級大蝦、紅鰽，加上以煙熏辣椒、洋蔥、番茄及芫茜作調味，伴上牛油果同脆炸粟米片。

不忘初心

今次嘅演唱會喺新伊館舉行，二汶同Ellen不約而同表示，有一種返鄉下嘅感覺。Ellen話：「at17上一次喺新伊館開show，已經係〇九年嘅事，到一〇年，我哋到咗一個樽頸位，於是就傾咗好耐，喺過程中我哋發現大家嘅想法有唔同，於是就分開發展，嗰一刻係有啲傷感，但又覺得係一種解脫，因為我哋解決咗一個問題。今次再喺同一個場開show，對我哋嘅意義好大。」

二汶就不得不多謝at17嘅伯樂，「如果冇明哥（黃耀明）嘅出現，我未必會入行，或者極其量喺文化中心外面Busking就好滿足。當時我哋好單純，一心只係想出一隻碟就算，從來都冇諗過之後會唔會喺樂壇發展。

「明哥係我嘅人生導師，他曾經話過，我們要知道自己嘅好同唔好。佢一句好簡單嘅說話，但對我哋嘅意義好大，甚至直接影響我對上一隻碟嘅理念；亦令我明白，企喺台上要承受同面對嘅脆弱感，所以自己要俾信念同力量自己。」

二汶表示，組合同個人發展時嘅心態完全相反，單飛嘅時候佢同Ellen都捱過，只要一向對方訴苦，大家都即刻明白自己嘅經歷。

十五年嘅對比，佢哋仍然會回味。

何爾摩沙海灘烤魚（$248）為海灘風味烤紅鰽，伴上自家醃製蔬果、洋蔥、炭燒檸檬及粟米餅，魚肉鮮嫩。

粟米餅拼盤為大廚精選粟米餅拼盤，包括雞肉（$50）、豬肉（$50）、牛肉（$60）及椰菜花肉（$50），四款口味，各有特色。

積極籌備

單飛之時，應屆台灣金曲獎「最佳編曲人」得主Ellen，就發現自己昔日睇小咗二汶嘅角色，「嗰時我覺得，負責唱歌嘅人淨係背歌詞就OK，到我一個人去台灣發展，先明白一個演出原來有咁多嘢要兼顧。以前有二汶幫我辣㷫啲觀眾，令佢哋對下一首歌有期待，仲作埋古仔添！但單飛之後我要由頭學起，o依家重組對我嚟講，簡直係放假！」

雖然話「放假」，但佢哋都積極為演唱會籌備，二汶話：「我又要重投減磅嘅懷抱，勤力啲做運動同注意飲食。希望上台嗰時係最佳狀態，因為都有啲look要carry吓。有粉絲話想睇我哋着裙，都要等吓嘞！」