奶媽上場 研撤「限奶令」
特首林鄭月娥首份《施政報告》出爐，當中有一項建議較鮮為人注意，但影響都唔細嘅，就係檢討實施咗近五年嘅「限奶令」。
據了解，政府已成立專責小組喺未來一年開會討論，據悉成員包括食物及衞生局官員、海關、業界，以及消委會代表，佢哋會檢視o依家整體奶粉供應鏈最新情況、市民訂購奶粉嘅渠道，以及檢控情況，最後作出總結係咪要保留「限奶令」。
消息人士說：「限奶令推出嘅時候，講明係短期措施，但實施咁多年以嚟，極少call人檢討計劃。加上o依家奶粉供求情況今非昔比，搵持份者傾有無改善之處，以及制定長遠穩定供求嘅機制都係理所當然。」
消息人士強調，政府無既定立場，但任何改變一定要保障到香港細路有足夠奶粉供應，「大原則係確保香港BB有奶粉飲，之後再睇有無空間調整。」
「限奶令」於一三年推出，規定離港不足廿四小時，最多可以攜帶一點八公斤配方奶粉出境。政策推出之後，奶粉商已着手穩定貨源，為登記咗嘅家長每月提供奶粉，大大改善「奶粉荒」嘅問題。
另外，本港奶粉需求量近年都減少咗，入口貨量由一四年嘅四千七百萬公斤，減至近兩年維持喺四千二百萬公斤水平。
違法帶奶粉出境嘅個案都穩定落嚟，由一四年有五千幾宗，減至去年三千八百多宗。多個數據顯示奶粉問題已得到控制，當局想從善如流檢視政策都好合理，此舉亦有舒緩中港矛盾的作用。
有奶粉商說：「五年前問題失控，喺非常時候要用非常手段，可以理解；但o依家已經受控，奶粉供求應該跟番市場主導原則。」
據悉，林鄭周一宴請立法會議員時，也有議員當面向林鄭反映，北區居民擔心撤銷「限奶令」後，水貨問題會加劇，在場官員則強調檢討時，會考慮居民嘅憂慮。
特首林鄭月娥首份《施政報告》出爐，當中提到會檢討「限奶令」，據悉，政府已成立專責小組喺未來一年討論係咪保留。
「限奶令」推出前，大批內地人來港掃奶粉，但禁令推出後，本港奶粉需求量略減，入口貨量由一四年嘅四千七百萬公斤，減至近兩年嘅四千二百萬公斤。
「限奶令」推出近五年，初時講明係短期措施，但咁多年以嚟，極少call人檢討計劃。
