港澳大換馬　張曉明執掌港澳辦　王志民接任香港中聯辦

今年六十七歲嘅港澳辦主任王光亞即將榮休，外界一直有傳香港中聯辦主任張曉明會接任，並會喺澳門立法會選舉結束後落實任命。本刊接獲獨家消息證實這個傳聞，相信最快會喺今個星期三公布。

消息人士透露，張曉明升職後，騰出嘅香港中聯辦主任職位，會由六十歲嘅現任澳門中聯辦主任王志民接任；而澳門中聯辦主任個位，則由現任中央對外聯絡部副部長鄭曉松接替。

港中聯辦前身係新華通訊社香港分社，係中央駐港嘅三個機構之一，專門處理香港事務，而港澳辦則是隸屬國務院嘅行政機構，顧名思義所有關於香港及澳門嘅事，港澳辦都會管，職權比港、澳中聯辦大。

張曉明升職執掌港澳辦，足見中央對佢嘅信任度。擁有中國人民大學法學碩士嘅張曉明，一九八六年已經加入港澳辦，做過時任港澳辦主任廖暉嘅秘書，四十一歲升正做港澳辦副主任，成為當時最年輕嘅副部級官員。為人低調內斂嘅佢，曾參與特區籌委會嘅工作，見證香港回歸過程，一二年起出任香港中聯辦主任，任內處理過政改、港獨等風波。
張曉明嘅繼任人王志民，今次可謂重返故地，事關曾經喺解放軍服役嘅佢，一九九二年起已涉足香港事務，做過新華社香港分社辦公廳副處長，○六年升任為香港中聯辦副秘書長兼青年工作部部長，兩年後做埋副主任，二○一五年接替退休嘅徐澤擔任港澳辦副主任，王志民同香港嘅關係，可謂千絲萬縷。

今次「音樂椅」另一主角係鄭曉松，外界可能對佢嘅認識唔多，但原來五十八歲嘅鄭曉松來頭好猛，講得一口流利挪威語，曾經報讀英國牛津大學外交官研究生，做過時任外交部前副部長姜恩柱嘅秘書，以及新華通訊社香港分社社長秘書，同香港都算有淵源。他二○一六年七月，調任中共中央對外聯絡部副部長，主責從事政黨外交，外界一直有傳佢仕途無可限量，如今他接棒做澳門中聯辦主任，他係適合人選。

本刊獲悉王光亞（右）退休，不日將公布由張曉明接棒出任港澳辦主任，張曉明仕途再上一層樓。

現任澳門中聯辦主任王志民（白衫者）喺早前天鴿襲澳期間，曾落區視察解放軍救災情況。

五十八歲的鄭曉松曾以福建省副省長身份訪港，跟時任政務司司長林鄭月娥有過一面之緣。