未來全球經濟展望
英國嘅脫歐條款細節現階段仍有待商討推敲,德國距離大選亦只剩幾日,我主觀希望總理麥克爾(Angela Merkel)可以成功連任,我主觀唔希望德國嘅選舉結果,會為發達經濟體嘅歐洲添上政治變數。
有數據顯示德國、法國、意大利、西班牙同英國嘅平均政治風險指數,喺剛過去嘅十幾個月迅速驟升咗,不久將來如果出現同英國脫歐公投咁激嘅政局動盪,歐洲經濟體嘅平均增長率便將可能拖慢達約0.5%。
同一時間,新興國家喺社會不滿情緒蔓延、同安全風險攀升推波助瀾嘅情況下,政治風險指數相對亦高過之前,如果再出現新增嘅安全風險因素如種族歧視、地域衝突、恐怖襲擊等在內,屬高危風險嘅國家俄羅斯同土耳其就一定榜上有名o架喇。
今年2月,羅兵咸永道(PricewaterhouseCoopers-PwC)撰寫以購買力平價(Purchasing Power Parity-PPP)推算全球經濟增長表現嘅報告《長遠前景:2050年前全球經濟排名如何演變?(The long view: how will the global economic order change by 2050)》,報告中指出由2016到2050年,全球經濟力量由傳統先進經濟體,轉移至新興經濟體趨勢將持續發展,年均經濟增長率約2.5%,有部分國家經濟表現即使參差不齊,長遠觀望新興國家喺全球嘅GDP比重仍將持續增加,亞洲地區預計會係全球擁有最大嘅經濟體系。
心水清嘅朋友可能會話唔睇個報告,都唔難預測到中國有望做全球未來嘅經濟霸主,呢啲經濟推測當然建基於未來世界上無咩大事發生至得啦,至目前為止,2017年有啲令人意想不到嘅政治風險,都應該非北韓嘅金仔莫屬,不過好多朋友同我應該一樣都唔希望有仗打。
隨着全球人口老齡化,市場嘅勞動力亦相對下降,內地仍有大批工人需靠工作過活,據坊間統計2010到2014年期內,內地接受過高等教育嘅在職人士薪酬增逾約五成,但基層嘅一批每年或只靠最低工資上調養活,喺可見嘅將來,內地推動知識型經濟嘅同時,我覺得或可以透過提供更多社會保障、同福利去平衡市場嘅勞動力。內地生產總值年均增長率平均只達約4.4%,預測未來20年,中國未必會有好似之前嘅高速經濟增長。
羅兵咸永道嘅報告預計到咗2042年,全球經濟總增長將會較現時倍增,其增長動力主要源於新興市場及發展中國家,未來嘅三十幾年,七大新興市場國家(E7)、即指中國、巴西、印度、印尼、墨西哥、俄羅斯、土耳其,期內嘅年均經濟增長率達約3.5%,七大工業國(G7)、即指美國、英國、加拿大、法國、德國、意大利及日本,期內嘅年均經濟增長率亦只達約1.6%。簡單嚟講,未來全球最大七個經濟體之中,有六個預測會屬新興市場,呢個預測亦都好容易估得到。
英國即將展開脫歐程序,德國、法國、意大利、西班牙等國 政治風險指數也上升,未來都可能拖慢歐洲經濟增長。