![](http://eastweek.my-magazine.me/tmp_images/article_images/69751/bbe196035a16426f3793594a6fa764b13d9836ef.jpg)
許冠傑物業市值跑輸許冠文
許冠傑(Sam)同許冠文堪稱娛圈中,最具影響力嘅真兄弟,一個係歌神,一個係笑匠,冇乜人唔識呢對「許氏兄弟」。今年六十八歲嘅許冠傑,喺七十年代已經係粵語流行曲嘅先驅,膾炙人口嘅歌曲,諷刺時弊,蘊藏哲理。當年紅極一時嘅佢,喺八十年代已經收二百萬片酬拍電影《最佳拍檔》;而一直有儲開磚頭嘅佢,喺七八年就買咗沙田一個單位,時至今日佢一共擁有五個物業,只有一個做按揭,總市值逾九千萬元。
不過唔講唔知,原來許冠傑嘅大哥許冠文,手上揸住嘅物業以億計。喺九十年代,雖然佢買咗四個商廈單位,至今全部都升唔夠一倍,但係佢o依家自住、喺布思道嘅特色單位連兩個車位,由七五年手持至今,已升值八十五倍。佢總共擁有七個物業,完全冇做按揭,啲物業嘅總市值近一億二千萬元,超越歌神細佬。其實,兩兄弟邊會鬥呢啲呀?
早排,東姑好辛苦先撲到飛去睇許冠傑同譚詠麟嘅騷,最驚喜係演唱會嘅中段,佢安排咗許冠文喺電視螢光幕同大家見面;另外,又特別畀兩個仔仔許懷欣同許懷谷,拎住結他現場演唱佢嘅經典金曲,成功需父幹,阿Sam兩位公子名下都未有物業,佢密密開演唱會莫非想幫佢哋入市?
![](http://eastweek.my-magazine.me/tmp_images/resources/69751/1.jpg)
日前,許冠傑與譚詠麟開演唱會,吸引咗好多圈中人捧場, 呢一晚就有宣萱現身,佢畀阿Sam發現咗之後, 立即被捉上台跳舞。
![](http://eastweek.my-magazine.me/tmp_images/resources/69751/2.jpg)
大佬許冠文除咗喺螢光幕講嘢之外,第一場仲親身到場撐細佬。
![](http://eastweek.my-magazine.me/tmp_images/resources/69751/3.jpg)
演唱會中段,許冠傑安排咗兩位兒子許懷欣(左一) 同許懷谷(左二),狂唱自己嘅經典金曲。
![](http://eastweek.my-magazine.me/tmp_images/resources/69751/4.jpg)
許氏兄弟:許冠傑、許冠英、許冠文、許冠武,「文武英傑」四位手足,許冠文與許冠傑最為人熟悉,而許冠武從事幕後較低調,至於許冠英則於一一年過身。