主頁 > 專欄 > Paco巨星飯堂 > 十二年一遇 2017 年 08 月 24 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

十二年一遇

緣份係玄妙嘅。十二年前，我同導演葉偉信喺電影《殺破狼》中合作，以實戰格鬥動作風格贏盡口碑；十二年後嘅今日，葉導再次執導電影系列第三部曲《殺破狼．貪狼》，將首作建立嘅獨特風格，更加發揚光大。

今次「Paco巨星飯堂」，我就帶葉導，及戲中兩位關鍵女角：蔡潔（Jackie）同陳漢娜（Hanna），去到位於銅鑼灣嘅「Coast Seafood & Grill」，品嘗鮮味嘅海鮮盛宴，細說電影背後嘅故事。

喺名導葉偉信（中）嘅導演筒下，Jackie（右）同新人Hanna（左）喺《殺破狼．貪狼》中嘅表現，更可圈可點。

原導演出手

經典嘅《殺破狼》系列，sell真人實打真功夫，首集由葉導操刀；兩年前《殺破狼2》則改由鄭保瑞執導，葉導轉做監製。結果不負眾望，票房勁收5.6億人民幣。最新一部《貪狼》，導演同監製再大執位，於是造就咗我同葉導，相隔十二年後再度攜手合作，令我好興奮。

新片貫徹過往風格，亦滲入感人情節，可以話係一部成功嘅劇情動作片。葉導話：「其實上一集嘅角色好特別，所以籌備呢部戲嘅時候，我就同鄭保瑞商量，想將其中一個角色作出少少改動，變成另一個故事，最後演變咗另一個古仔出嚟。

「戲名嘅《貪狼》係指貪狼星，係最重感情，所以戲入面嘅角色都係重情感，喺豐富嘅動作戲中亦不失情義。我最難忘係，第一日拍Tony Jaa，喺梯間拍佢同Chris Collins對打，點知佢彈跳力勁得滯，一跳就撞上天花板，個頭爆咗要即刻入醫院，我心諗『大鑊嘞！』，佢咁嘅情況點都要唞成個禮拜，但係Tony好專業，兩日之後就帶傷返嚟繼續拍。」

自《爆裂刑警》起就同古仔合作多次，葉導同老拍檔合作，好多時一個眼神或者一句說話，已經知對方嘅諗法。「有一場戲，古仔喺演繹嘅時候一句對白都冇講，我就同佢講：『呢個演法感動唔到我喎。』，之後佢用另一個方式去演，我就好OK。我都要多謝佢咁信任我！我相信所有觀眾都期待古天樂嘅演出，係佢嘅代表作。」

我帶三位嘉賓去到位於銅鑼灣嘅「Coast Seafood & Grill」，一邊品嘗既有特色又新鮮嘅海鮮大餐，一邊暢談激烈打鬥外嘅《貪狼》。

招牌海鮮盤（$1,480），包括：波士頓龍蝦、皇帝蟹腳、生蠔、西班牙深海紅蝦、虎蝦、日本帶子刺身、油甘魚刺身及紐西蘭鑽石蜆，樣樣鮮味。

藍鰭吞拿魚夏威夷沙律（$128/80g），用新鮮嘅藍鰭吞拿魚炮製嘅前菜，鮮甜又開胃。

每日新鮮烘焙香草番茄乾包伴黑松露菌牛油（$45），兩者配合得宜，每日新鮮烘焙，品質有保證。

最關鍵女將

喺陽剛味咁濃烈嘅電影中，Jackie同Hanna嘅角色，都係對劇情發展極為關鍵嘅人物。Hanna話：「我喺戲中飾演古天樂個女，因為我喺泰國失蹤，所以佢先會去搵我，引伸成個故事。今次係我第一次拍電影，就要同古天樂做對手，拍之前我好緊張o架！不過佢好好人，會同我傾偈放鬆心情，令我冇咁緊張。

「成部戲嘅劇情發展，同我拍嘅次序係完全相反嘅，我拍第一場戲，已經見識到古天樂秒速喊嘅神技，佢投入角色嘅速度好快，可以想像到佢背後做咗好多功課，我都學到嘢。」

Jackie今次就為藝術犧牲，「我飾演泰國嘅妓女，俾光哥（盧惠光）飾演嘅警察虐待，所以就同古天樂爆料，話光哥同佢個女失蹤有關，令古仔發現幕後牽涉人體器官販賣。我記得導演講過，成個故事係講人同人嘅情同關聯，而我同古仔喺戲入面只係萍水相逢，但係偏偏就係我幫咗佢搵女。」

戲中Jackie同古仔原本毫不相干，但佢係後者千里尋女嘅關鍵人物。

喺拍攝同盧惠光嘅SM戲份時，Jackie刻意隔離自己，全情投入角色。

黑毛豬鞍（$280），外層燒得香脆，但內裏保持嫩滑多汁，極考功夫。

豐富開工餐

劇情緊張而沉重，但係講到開工時嘅伙食，葉導表示：「我真係想日日喺泰國開工！喺香港拍戲，食飯就要快，都係得飯盒食，食完就嗱嗱臨繼續開工。喺泰國拍呢部戲嗰陣，日日都有餐車，有泰國嘅工作人員，日日喺街市買餸，然後煮嘢俾我哋食。就算係半夜三更，想食碗泰式魚蛋粉都即刻有人煮，因為佢哋係廿四小時stand-by。」

不過兩位女士就無口福嘞，Jackie話：「我同Hanna都係要為個角色keep住瘦，所以冇得食餐車啲buffet，仲要自己帶個電飯煲去開工，煮啲清淡嘢，好似烚菜同粥水填肚。」