出名孝順的謝霆鋒，今年五月豪擲八千五百萬元掃入淺水灣、面積約二千呎的複式向海豪宅，送給老竇謝賢（四哥）；連埋各項費用，霆鋒這份孝心真係億億聲。

在今個月八十一歲生日的四哥，就較啱時間去驗收這份大禮。日前，心情靚靚的他，親自上門收樓，在新屋內團團轉，又指手劃腳，對裝修設計滿有大計。事後，他即心急到灣仔選購浴室用品，樣樣親力親為，似乎想盡快入伙。

四哥的新居位於中層，是複式單位，有兩房兩廳，還對正一望無際的海景。

今年五月，四哥獲大仔霆鋒豪送八千五百萬淺水灣豪宅，他笑言心裏感恩︰「我冇生錯呢個仔。」

要扮瀟灑

日前下午，四哥由司機從陽明山莊的寓所，接送到新屋淺水灣的怡峰。從地產經紀手上接過一大抽鎖匙，正式收樓的四哥，心情雀躍，隨即在單位內四圍參觀。新居屬複式兩層，實用面積合共二千呎，現場所見，他不時手指指，似乎對裝修設計都有晒計劃，跟着又測試燈掣、窗簾等，檢查得十分仔細。最後，他走出偌大的露台眺望遠景，對正的是一望無際的海景，景觀開揚怡人。歎住海風的他，又忍不住與旁人繼續分享其家居品味。

對於有新屋住，四哥滿心歡喜的說︰「間屋都幾大o架，兩層，都好貴，要八千幾萬。」問到有否多謝阿仔霆鋒？他坦言：「唔通要我跪喺度多謝佢咩？梗係扮瀟灑啦！不過，我心裏面嗰句係『我冇生錯呢個仔』。」

四哥正式做業主，日前，他隨地產經紀到淺水灣的豪宅收樓，走勻兩層二千呎面積單位後，更走到露台睇風景，心情超靚。

見到露台望正超級無敵大海景，四哥興奮得不停讚歎，手舞足蹈。