林子健被擄案疑點多　圖拖「一地兩檢」落水？

近排政界就「一地兩檢」討論得沸沸揚揚之際，民主黨創黨成員林子健突然開記招，聲稱自己喺油麻地被內地「強力部門」迷暈擄走，再蒙眼毆打，喺大腿打上廿一口釘書釘。泛民人士隨即借題發揮，聲稱內地「跨境執法」，誓要反對「一地兩檢」云云，但事件發酵多日疑點漸露，林子健前言不對後語。

唔少人質疑，點解林子健事後唔即時報警，反而先返歸瞓覺，而且仲有心情去洗衫，再去餐廳醫肚都唔拔走釘書釘，況且佢對第一案發現場一再改口，令警方未能即時翻查附近閉路電視及相關資料，更惹疑竇。有人就質疑佢想藉事件轉移視線，激起市民反「一地兩檢」嘅情緒。

林子健聲稱事發前三日收到內地男子來電恐嚇，又指該男子係佢多年前做民主黨中委時，經黨內「少壯派」成員介紹認識，即係現時新民主同盟成員范國威、關永業等。不過，關永業等皆跳出來強調絕無此事，要求林子健提出證據。

唔少政界中人均奇怪，林子健並非著名政客，而撐已故內地異見人士劉曉波嘅知名政客大有人在，點解獨要恐嚇他？其實，林子健係民主派中嘅「邊緣人」。○六年一個署名「真兄弟」嘅人，大爆黨內「少壯派」疑被滲透。當時埋咗「少壯派」堆嘅林子健聲稱係司徒華「條針」，被派去「少壯派」暗查滲透一事，最終林無被踢出黨，「少壯派」就集體退黨另組新同盟。林有得留低，但黨內成員對佢有戒心，「少壯派」又同佢反晒面，認真係兩頭唔到岸。

據指，林子健喺一四年患抑鬱，一六年又患上甲狀腺癌，病癒後曾經想上位，去年尾競逐民主黨副主席敗北。有民主黨前成員指，林子健行事作風甚受爭議，如一一年他就發起「癱瘓地產霸權一小時」行動，一行幾十人以毫子付款，企圖癱瘓超市，佢事後仲大放厥詞話：「呢個遊戲好玩」辣㷫唔少街坊，「呢啲挑釁行為，黨內成員都好反感，覺得佢搞屎棍。」該前成員說。

林子健聲稱被內地「強力部門」企圖擄走，大腿被打上廿一口釘書釘。但佢唔即時報警，仲有心情去洗衫，更惹疑竇。

林子健對第一案發現場一再改口，令警方未能即時翻查附近閉路電視及相關資料，調查困難。

林子健自稱係司徒華「條針」，被派去「少壯派」查滲透一事，最終林無被踢出黨，「少壯派」就集體退黨另組新同盟。