沈震軒有份參與作曲的新歌〈打不死〉，有着這樣的歌詞：「男人不可說話 用沉默緩和害怕男人不可脆弱 願承受別人拳打……」

他坦言，這是一首為自己發聲的歌，畢竟一直以來，他予人最深刻的印象，不是形象花弗愛媾女，就是被唱片公司太陽娛樂及無綫掟入雪櫃。「我阿爸教我，男人應該少說話、多做事。我之前有好多傳聞，但我不嬲都係選擇沉默，想用做嘢去代表我把聲。但過咗一段時間，我先發覺，原來咁樣反而會畀人誤會我係默認！咁我應該要open番少少，出嚟講番少少嘢，所以我就選擇用首歌，嚟話畀大家知，我係個乜嘢人。」

若以加入無綫藝員訓練班計起，他今年剛好入行十年，可是有一半時間，他都只是個茄喱啡，頂多只有兩句對白，能捱到今天，他並非靠運氣。「咁樣對我嚟講係好嘅，我唔係天才，如果一開始就畀好多對白、好多戲我，反而仲累死我！所以，可能有人會覺得陳凱琳、蔡思貝啲演技仲未得，但其實佢哋已經好叻！」

外人有否因為這首歌，而了解沈震軒真正的為人，估計不來，但起碼，他可以為自己打打氣，繼續堅持走前面漫漫長路。「我起步比人慢，後面我咪跑番快啲囉！」

這種精神，就是他的新歌要說的。

 

沈震軒近日推出新歌〈打不死〉，除了參與作曲，更親自執導MV，找來灰熊（抱細路女者）作當中男主角，演繹男人心聲。

五十蚊

因為太喜歡唱歌，沈震軒○六年隻身由加拿大回港參加了新秀和無綫所舉辦的「TVbeople」招募，○七年入讀無綫藝訓班才正式入行。據說當時無論有多少演出，月薪都只有八千大元！

「邊有咁多呀？六千咋！我嗰陣喺尖沙咀住劏房，百零呎，只有一張牀、一個衣櫃同一個洗手間，四千蚊租。所以我每日都唔可以使超過五十蚊！好彩我有幾個好兄弟，每次出嚟，見我面有難色，都會主動開口：『唔使講嘢，想要幾多錢呀？』」

這樣的月薪，持續了五年，他說，猶幸早已是過去式。「畀着o依家，真係冇可能生活！茶餐廳食個晏，都要三、四十蚊，黐線！所以我好懷疑，o依家讀訓練班嘅人，應該全部都好有錢！點捱啫？搭車唔使錢呀？衫都要買o架！」

就是因為生活壓力，沈震軒說，每年的藝訓班，入讀的有二、三十個，但最後仍願意繼續捱的，往往十隻手指數得晒。「我嗰屆o依家仲做緊嘅，就只有黃智雯、張景淳、游莨維、何傲兒、蔣家旻同趙希洛，所以我仲喺度，叫做好好彩！」

一五年，他（左）跟音樂監製好友覃嘉健（右），曾往東京旅遊時，孭着結他即興在彼邦街頭busking。「呢個經驗相當好玩！」