「富豪紅娘」Boe姐 月撲十五萬養家

人稱「富豪紅娘」嘅Boe姐（顧紹芬），早年一度活躍於娛樂圈，○四年嗰時，有傳佢介紹咗姪女Cindy畀富豪鄭裕彤認識後，帶挈咗Boe姐入住土瓜灣傲雲峰一個單位。但上年，Boe姐忽然數臭姪女反骨，大爆前年Cindy收回單位兼聲稱幫佢交六千元租金，但一年後卻冇晒下文。

兩姑姪因財失義，要自力更生嘅Boe姐，一家三口o依家住喺用萬七元租嘅單位。屋內無乜布置，客廳擺咗幾個紅白藍袋，另用膠櫃載雜物。佢向東姑大吐苦水︰「我老公有鼻咽癌，要定期睇醫生。我自己又有三高，攞藥又七、八千。個仔有自閉，要讀私校，仲要畀租、食飯，每個月開支都十五萬。」佢話為咗搵錢養家，除咗做傳銷外，又簽咗個內地男歌手，「我要努力工作。唉……同佢（Cindy）冇聯絡，佢都改晒電話。」家和萬事興，東姑希望佢哋可以和解啦。

Boe姐話個單位雖然係細，但勝在景觀開揚，仲睇到海㖭。

Boe姐一直住開土瓜灣，由昔日嘅千呎農圃道豪宅，但因姪女拒絕金錢支援，則要愈搬愈細嘅單位。

Boe姐在深圳簽了個男歌手，剛在上月底嘅演唱會有份演出，同場仲有王傑。

佢話以前姪女Cindy（右）剛來香港時，都係住喺佢屋企。