高鐵被泛民議員咬實唔放，港鐵上周安排咗立法會議員去參觀高鐵西九龍總站及石崗列車停放處，由港鐵主席馬時亨帶隊，有十八位議員出席。佢哋睇到高鐵車廂內籠設計新穎又寬敞，真係流晒口水，仲玩得不亦樂乎。

高鐵車身以銀色為底色，車頭採用流線型設計，兩側印有象徵飛龍嘅橙色弧形花紋。全架列車有八卡車廂提供近五百八十個座位，安裝咗多個行李架、飲水器等設備。

頭兩卡係商務艙，以一行四個座位排列；其餘六卡係普通艙，每行有五個座位。但無論邊一個艙，都可以無間斷收到Wi-Fi上網。

內籠麻雀雖小，但百寶多多。以商務艙為例，最大亮點係所有乘客都坐旋轉櫈，民建聯立法會議員柯創盛大讚，張櫈比起飛機椅仲要先進，「成張櫈可以一百八十度旋轉，撳一個掣就轉到身，同櫈後嘅朋友傾偈，超方便！」因為可以旋轉，乘客就唔使坐「倒頭車」，而且呢款櫈好窩心地喺椅背，加裝咗一個獨立照明燈同叉電位，乘客開燈睇書都唔會影響隔離位，設計夠晒貼心。

呢款座椅唔係虛有其表，都好講實際用途。話說當日，體重二百幾磅嘅議員張華峰二話不說，用自己重量級身型測試承托力，結果都坐得好穩陣，佢即時豎起拇指大讚：「頂呱呱！」引來成班議員哄堂大笑。

普通艙都唔執輸，車廂空間唔狹窄，仲有位伸出餐桌開餐。雖然張櫈無得旋轉，但只要按一下掣，櫈背可以隨意調校弧度，方便乘客挨後坐，半臥瞓吓都咁舒服。座位仲用上又紅又橙又灰嘅顏色，刺激乘客眼球，令車廂無咁單調。

由於部分車程可能超過一小時，車上廁所絕不能馬虎，連供傷健人士使用嘅「殘廁」都好講究，內裏安裝咗扶手柄，廁格又寬敞，難怪班議員都話好似走入大觀園一樣，「希望高鐵盡快通車，等大家都有機會親身感受吓。」

港鐵主席馬時亨（第二排右三）帶隊，同十八位立法會議員參觀高鐵西九龍總站及石崗列車停放處，玩到不亦樂乎。

高鐵座位寬敞，普通艙座椅色彩繽紛，令車廂無咁單調；商務艙喺椅背加裝獨立照明燈，唔會燦親人。

高鐵小資料

型　　號： CRH380A

車卡數量： 每列8卡

車身長度： 全長203米、闊3.38米、高3.7米

座位數目： 579個 （另設2輪椅使用者空間）

最高速度： 350公里 / 每小時

行駛速度： 200公里 / 每小時

高鐵原定明年通車，但「一地兩檢」清關方案被泛民阻撓，通車仍存變數。