應采兒廿四孝辣媽
應采兒(丁丁)同陳小春婚後生咗囝囝Jasper(小春子),啱啱年滿四歲。咪睇佢哋兩公婆平時大情大性、大癲大肺,好似大細路咁,自從生咗Jasper之後,都變晒廿四孝父母,錫到個仔燶。
早前,東姑喺天后撞到丁丁母子,嗰日咁啱落住傾盆大雨,條街又濕又滑,見佢哋位司機哥哥緊張擔住遮,護住「少奶」同「少爺仔」過馬路上車。由於一把遮三個人分,廿四孝阿媽愛兒心切,全程攬到個仔實一實,慌死囝囝整濕身;而司機哥哥亦絕不怠慢,主力擔遮護住「少爺仔」之餘,仲幫「少奶」拎埋手袋,寧願自己濕晒半邊身。
後來,架車直駛去咗淺水灣一個出名多小朋友嘢玩嘅商場。到埗後,司機哥哥仲落車抱起「少爺仔」Jasper,送埋兩母子入商場,好服侍到加零一。
其實都唔使奇怪,皆因Jasper集父母萬千寵愛於一身,連爹哋小春、媽咪丁丁都係「仔奴」,日日當囝囝「大少」咁湊,更何況呢位司機哥哥,對「少主」就更加落力服侍啦!
小春同丁丁喺一〇年結婚,三年後誕下小春子Jasper,眨下眼,囝囝已經四歲嘞。
司機哥哥小心翼翼,擔遮護住「少奶」應采兒,同「少爺仔」Jasper過馬路上車。
丁丁將囝囝抱到實,而司機哥哥護住「少爺仔」之餘,仲幫「少奶」拎埋手袋,結果淋雨淋濕半邊身添。
司機哥哥抱埋「少爺仔」Jasper落車,跟住一個箭步衝入商場;而東姑留意到佢哋大人細路都着黑色,唔通係陳家嘅制服。
司機哥哥對「少爺仔」咁好服侍,Jasper都好乖巧兼有禮貌,玩完上車會同佢打招呼。