入行八年的袁嘉敏，自兩年前豁出去、拍露點三級片《鴨王》後，成功打響「性感女神」的名堂，難怪工作和收入都翻幾番，更由中環山腳進駐半山。

不過，「性感女神」風光背後的淒慘事，又有幾多人知？日前，袁嘉敏接受本刊獨家訪問時，盡訴心中情，揭開娛圈中暗黑的一面：幕前，拍情慾戲時遭人「霸王硬上弓」；幕後，又被「中間人」設局兼侵吞「利是」，可憐自己勢孤力弱，惟有啞忍。但是，竟連男朋友和身邊好友都不諒解，說到這股錐心之痛時，她梨花帶雨。

內心萬般委屈的她，決意將個人的辛酸經歷化成文字出書，更盡地一煲，影下終極的火辣照，從此正式「封咪」，走自己喜歡的路。

憑選港姐入行的袁嘉敏，自拍三級片後知名度大增，雖然換來不少工作機會，但同時卻惹來不少誤解，百般滋味在心頭。

猖狂被問價

〇九年選港姐入行的袁嘉敏，有學歷、有樣貌、有身材，可是在無綫卻發展平平。一三年約滿後，她解開衣鈕跳入大銀幕，在兩年內拍足五套「牀戲」。當中，她更露點演出電影《鴨王》，將其天賦的身材表露無遺，風頭一時無兩，還被喻為新一代「性感女神」，但同時亦惹來不少人「問價」。

袁嘉敏透露，近兩年大概推卻了一百單「飯局」，價錢由二十至兩百萬不等，「佢哋好多係喺微訊度問，愈來愈猖狂。例如︰先話有工作搵我，試過話請我去北京出席一個公司周年晚宴，我問晒啲基本資料，臨上機前，嗰個人竟然話個周年晚宴得佢同我兩個人。又試過，佢叫你買張機票去邊度，話落咗機有車接，我梗係全部都冇去。其實，喺內地登台，我都試過畀人逼去食飯，我唔肯去，可能咁得罪咗人，有人喺網上寫我『兩萬八蚊唱歌包埋上牀』，我每次睇到都會喊，因為根本唔係事實！」

類似事件不止在內地，香港一樣有。袁嘉敏爆料，指出曾有個電影圈前輩邀請去食飯，「嗰日四個人食飯，席間好正常，但臨尾個前輩叫我去廁所。我十分鐘後返嚟，當時有個男人手震震咁拎住封利是畀我，仲話︰『祝我身體健康。』嗰封利是有近一萬元，個前輩見到，竟然出手搶咗封利是。個前輩喺圈中係好有公信力，對於呢件事，我都好驚訝！之後，佢都仲有再搵我，但我就冇再去。」

日前，她在接受本刊獨家訪問時，忍不住痛哭落淚，盡訴心中的委屈。

拍戲被欺負、工作又辛勞、外間輿論多多，前男友又不理解，袁嘉敏愈講愈激動，更淚如雨下。

性騷擾留言

而發生在袁嘉敏身上的「問價」事件，也可謂層出不窮，竟然連的士司機都對她垂涎，「有日我電召的士，嗰日我都着咗黑色風褸，好密實；但事後，個的士佬竟然發短訊畀我︰『我今晚同你去酒店，幾錢一晚？』又試過call貨車，個貨車佬又寫埋啲『我好興奮』嘅留言，我即刻block（封鎖）咗佢！」

其實一切「問價」，皆因接拍三級片《鴨王》而起。袁嘉敏由拍攝到上映期間，新聞多多，除遭其他演員聯手針對外，更盛傳她的情慾戲，臨時由兩場變六場，又無故被要求下體噴水等，她完全無得say no；還有，電影未上畫，其露點片段已瘋傳任睇。當時，接二連三的打擊，令她的壓力爆燈，一度看足三個月心理醫生抗抑鬱。「之前拍戲經歷，有啲情節唔想拍，但又要配合導演，搞到我有心理陰影。」拍戲被「霸王硬上弓」的事件，她屢遇不鮮，早前接拍的內地網絡電影，合約寫明沒有大膽場面，但事後竟遭移花接木，她無奈的說︰「我冇簽經理人公司，我得一個人，人哋會蝦我，自己出聲都冇用。」

自言演戲大膽的袁嘉敏，私下很保守，思想更十分傳統。出身草根家庭的她，指童年生活悲苦，自小已要做兼職幫補家計，其後又獨自到澳洲半工讀，不時居無定所，生活一直勞勞碌碌。她憧憬廿一歲時結婚生仔，可惜真命天子難求，有舊愛更出言嫌棄，「之前有個嫌我父母住公屋、冇家底，話自己舊女友嘅爸爸係大學教授，仲住陽明山莊喎。」

袁嘉敏（右）是〇九年港姐「最上鏡小姐」得主，同屆冠軍是已嫁玄學家李丞責的劉倩婷（左），而該屆的港姐大多已結婚生仔，惟獨她仍在娛圈中浮浮沉沉。