人與人嘅緣份，有時極為玄妙，成為朋友，甚至閨密，都係要靠緣份。今次「Paco巨星飯堂」，就邀請到兩位相當有緣嘅閨密：陳慧玲博士（Heidi）同「鄺美人」鄺美雲（Cally），雖然佢哋分處澳門、香港，但喺緣份巧妙嘅安排下，二人成為無所不談嘅閨密。

我就帶兩位貴賓，去到位於中環嘅「中華匯館」，品嘗既精緻又具特色嘅中菜，細說二人嘅緣份。

唔講唔知，原來Heidi同Cally係閨密，二人惺惺相惜，因而建立友情。

因佛結緣

講到同Heidi嘅認識，Cally表示：「我之前對Heidi嘅印象，就好似外界咁，但係之後喺一個佛教活動上見到佢，先有機會了解多啲，先知道佢好有佛心，又好用心咁做善事。佢咁年輕，個人好善良，我見到佢好有心咁為社會做嘢，大家就愈嚟愈close。」

身兼仁愛堂副主席嘅Heidi就話：「我媽咪都有拜佛，所以我會陪佢去一啲佛教活動，有緣聽到Cally錄嘅《心經》，之後喺屋企loop住播，嗰時我啱啱生完BB，聽到佢嘅歌聲，我覺得成個人都好平和。我仲有抄經，抄嘅時候覺得好peaceful。

「至於公益事業，係我一直都覺得應該做嘅事，所以我會繼續努力做，回饋社會。」

Cally接住補充：「佢o依家已經做得好好，佢有能力去推動社會，而且社會都需要呢個企業良心。」

哈哈哈！Heidi嘅生意業務廣泛，飲食、美容之外，嚟緊仲向時裝界進發。「我好鍾意Victoria Beckham，由佢嘅形象到佢嘅時裝，所以試吓喺出年我會推出『Heidi C.』嘅時裝，自己參與design，希望可以學習佢，出自己系列嘅品牌。我覺得o依家有好多人知我個名，可以省去咗一筆宣傳費，哈哈！」

我帶兩位閨密Heidi同Cally，去到位於中環嘅「中華匯館」，品嘗既精緻又具特色嘅中菜。

Heidi（左）同Cally（右）因佛結緣，仲成為閨密。中為「澳門禪淨中心」住持覺仁法師。

早前Heidi先後成為法國北歐大學榮譽商管博士（圖），及「世界傑出華人青年企業家獎」得主之一，令佢覺得自己嘅社會責任更加重大。

松茸汁浸豆腐（$100/位），豆腐切成菊花狀，加入用老雞湯及乾松茸煮成嘅湯汁，清香鮮味。

花雕醉乳鴿（$180），選用足十二兩重嘅乳鴿皇，以淡滷水入味兩日，醬汁用廿五年花雕、酒糟及玫瑰露發酵一星期，上桌時先淋於乳鴿上，菜式既能嘗到濃濃酒香，亦能嘗到乳鴿嘅鮮香。

秘製凍鮑魚（$80/隻），以秘製醬汁滷煮過後，再冰存兩天入味嘅凍鮑魚，鮑魚口感軟嫩，味道清香。

多向發展

除咗時裝生意，嚟緊Heidi先踏足健身界。「嚟緊我會投資一間健身中心，已經揀咗喺中環環球大廈開，會行會員制，有personal trainer單對單去train你，面積大概三千呎，試吓水溫先。我唔選擇做一般嘅健身中心，係因為我覺得一定要有個trainer喺隔籬督促住，先至會做到成績，呢個係我嘅經驗之談。」

Heidi即分享自己嘅keep fit心得。「我食好多嘢，又好鍾意食澱粉質，尤其係炒飯。大肚嘅時候，試過因為血糖太高，醫生叫我唔好再食飯。o依家我就算幾忙，都盡量安排一個禮拜做三次gym，每次兩個鐘，做TRX加泰拳。一六年開始做嗰陣，每次做完，第二日瞓醒，成身嘅肌肉都好痛，但我又會enjoy嗰種痛，因為效果好顯著，而且喺自己身上睇到。」

公事繁忙，Heidi仲要兼顧家庭，一提起兒女，佢笑得更加滿足。「同阿仔（周柏豪）真係好似friend咁，大女（Virginia）都係，細女（Damiana）得兩歲，係需要錫嘅時候，所以我會盡量抽多啲時間陪佢。」

繼續喺商界大展拳腳嘅Heidi，即將涉足健身界及時裝界。佢有份投資嘅健身中心即將開業，而以佢命名嘅時裝品牌「Heidi C.」，亦籌備得如火如荼。

上周Heidi帶細女Damiana到台北旅行，仲喺ig上載囡囡萌照，Damiana手上嘅巨型鑽戒，被指目測超過十卡。

錫子女錫到燶嘅Heidi，不時喺ig大晒溫情照。

要保持健美體態，Heidi信奉運動，每星期保持最少六小時嘅高運動量，boxing係其中一個環節。

鹿兒島茶美豚叉燒（$280），選用以混入茶葉於飼料飼養嘅日本鹿兒島茶美豚，每公斤只採用約450克嘅梅肉位置，參照傳統嘅叉燒而炮製，加上香甜嘅麥芽糖，令人一再回味。

冬瓜鮮蟹拑（$320/位），餐廳選用菲律賓肉蟹蟹鉗，十分厚肉，與冬瓜同蒸，瓜綿蟹鮮。

復刻經典

Heidi喺商場上百足咁多爪，Cally就「久休復出」，將於九月推出發燒碟，一慰樂迷。「本來諗住八月出嘅，但係我同阿熹（趙增熹）都想做到最好，所以就改喺九月出街。今次成隻碟都係佢幫我做，成個過程都好開心！

「近年我除咗錄佛曲，都冇乜點錄音、冇製作情歌好耐，今次隻碟全部都係情歌，我嘅歌有〈再坐一會〉、〈堆積情感〉、〈唇印〉；仲有翻唱人哋嘅經典歌，好似〈為妳鍾情〉、〈千言萬語〉、〈容易受傷的女人〉同〈心債〉，全部都會重新編排，加番啲新鮮感。」

為咗以最佳狀態錄音，Cally仲暫時戒辣。「平時我已經食得好素，係鍾意食辣啫，但係食辣會影響到把聲，所以我完成錄音之前，都盡量唔食辣。」

能夠被稱為「鄺美人」，Cally嘅keep fit之道係：「一定要食早餐，而且可以食得豐富啲，因為有一整日嘅時間去消化；午餐都可以食得多，但份量要比早餐少；晚餐就食少啲，而且唔需要食到全飽。」

一向口味清淡嘅Cally，本來為辣食愛好者，但為咗keep住靚聲錄新碟，佢就暫時戒辣。

Cally同著名音樂人趙增熹（右）私交甚篤，所以連佢製作發燒碟，都請嚟好朋友出手。左為劉兆銘。

餐廳老闆Carol（右二）同Heidi、Cally份屬老友，令飯敍氣氛更添熱鬧。

潮式煎煮斑翅（$260），選用新鮮東星斑打成斑翅，先煎香再煮係潮式獨有半煎煮法，煎香脆皮能封住嫩魚肉，再放進鮮甜濃味魚湯煮，鮮香嫩滑。

松露鮮菌冬菇包（$54、前），同香檳石榴粿（$58/位、後），前者賣相仿似冬菇，內裏釀入牛肝菌、松露及鮮雜菌，係Cally推介；後者以鮮石榴汁製成的粉紅色的外皮，包着以香檳入饌嘅海鮮，造型精緻可愛。

陳草菇黑蒜燜法國珍珠雞（$280），選用法國珍珠雞，雞肉肉質嫩而有彈性，配上十分香郁嘅陳草菇，及有天然甜味嘅黑蒜，味道更具層次，更添滋味！

中華匯館
地址：中環士丹利街13號地舖
電話：25950808