難逃師徒反目魔咒　毓民　泰博　決裂內幕

政界真朋友難求，但為錢反目就經常出現，好似熱血公民立法會議員鄭松泰（泰博）近排喺黨內嘅內部會議錄音流出，泰博承認同青年新政梁頌恆、游蕙禎「扮friend」，仲譏笑：「公眾係白痴！」

那段錄音泰博鬧埋同佢稱兄道弟嘅網台MyRadio創辦人黃毓民，話毓民唔應該腰斬徒弟、《熱血時報》負責人黃洋達主持嘅網台節目。毓民之後爆大鑊指《熱血時報》早前為設立狗仔隊搞眾籌，但其後狗仔隊無咗下文，捐款亦不知去向，有掠水之嫌。泰博透過fb承認，段錄音屬實，批評黨內成員洩密違反黨規。

有知情人士說：「毓民幾乎同每個徒弟都反目收場，今次都唔例外，醞釀咗一段時間。」去年，毓民、泰博及黃洋達等人組成「熱普城」劍指立法會選舉，最後只有泰博當選，成員之間開始有嫌隙，更展開連串清算行動。「內部唔少人覺得選舉失利係因為有二五仔，選後黨內開始捉鬼，仲流傳一份二五仔名單。」

「熱普城」內部猜忌擴大，毓民愈諗愈覺唔妥，決定停止向《熱血時報》每月揼水三萬蚊。無耐毓民突然喺電台節目公開表示收到恐嚇信，「信中附有一疊陰司紙及我家人的照片，仲形容我係『狗主』、『連三萬蚊都無』。」佢喺節目中稱，信件好可能係黃洋達等人嘅支持者寄出的。

種種事件都凸顯本土派表內不一，彼此早有心病。有知情人士認為，本土派票源好接近，某程度佢哋嘅競爭，比同建制及泛民都激烈。「大家都爭緊同一堆選民，但始終地區工作根基唔深，所以選舉期間就算幾有心病，都要一齊拉票先有號召力，但選舉結束後再無利用價值，大家唔o岩就擘面。」知情人士指出，o依家本土派經已四分五裂，想再團結起來好困難。「如果有補選，本土派恐怕都係一盤散沙，難成氣候。」

黃毓民（右）及鄭松泰舊年喺立法會選舉，形影不離地拉票，但如今此情不再，兩人展開罵戰，互數對方的不是。

毓民停止向黃洋達所屬的《熱血時報》揼水，令本土派決裂白熱化。

鄭松泰嘅黨內錄音流出，揭示原來佢同梁頌恆（右）及游蕙禎（左）係扮friend。