表面風光內裏憂傷

香港一七學年將推行十五年免費教育。半日制幼稚園；除咗彌補校舍租金以外均一律不准收學費；全日制學校即使容許都唔可以輕言收費。有朋友話有啲家長就算額外畀錢，都希望送子女入讀更好嘅私校，甚至有家長會送年幼嘅子女到外地升學，呢類家庭嘅開支相對會高好多，有理由相信當年風之后李麗珊嗰句經典廣告對白「原來養大一個BB 要成四百萬」，依家可能未必得喇。

閱報得知由理大同泰晤士高等教育合辦嘅創新與影響高峰會上，泰晤士編輯總監Phil Baty表示，香港係國際大都會，大學教育又多元化，傳統上已穩佔優勢，但據最新排名數據分析，香港無論喺大學研究、教學、論文引用量、國際化及產業收入等各項評分，得分都低過對手新加坡，至於大學產業收入一環，得分就更低過中國、韓國同台灣。 Phil同時亦指出，新加坡嘅評分來自兩間大學，但本港就有六間院校，兩者平均分會難啲去做直接比較，佢建議如果想提高香港嘅競爭力，港府應該考慮增加投放更多資源喺高等教育度，同業界緊密聯繫去改善整體表現，唔係就好難有突破。香港雖然地少，但能夠擁有六間入圍全球五百強嘅大學院校，值得引以為傲。

今次超過萬名不同學術領域、來自一百三十七個國家嘅學者，參與調查選出泰晤士高等教育第七屆全球大學聲譽排名，一如所料壟斷頭十大排名係英美大學。排第一位係哈佛，美國麻省理工同史丹福就蟬聯第二及三位，英國劍橋同牛津並列第四位，母校港大繼二○一三年後、終於重返四十大排第三十九位值得開心，中大同科大就維持排喺第七十一至八十位嘅組別；亞洲一哥就係日本、排第十一位嘅東京大學，首次躋身前十五名、排第十四位嘅係內地清華，首次打入二十大、排第十七位嘅係北大，香港嘅學府係時候要諗諗計要有創意嘅思維先得。

較早前瑞士洛桑管理學院（IMD）發表嘅「二○一七年世界競爭力年報」，香港再度蟬聯冠軍成為全球最具競爭力地區。報告分四個界別評分，香港喺政府效能、商業效率都係第一，整體經濟表現排第十一位，基礎設施就排第二十位，經濟表現就由去年第五跌至十一位，據路透社評香港競爭力其實「外強中乾」。

另外，代表着當地民眾生活成本（Prices），香港係六十三個國家或地區中，排喺第六十一位嘅中國大陸之後，即係我哋香港排尾二，意味着香港生活成本好高。中國大陸喺穆迪最近嘅評級報告下跌，反映大陸嘅結構改革不足以遏止債務上升，預料短期都難以得到明顯改善及存在隱憂，香港好難獨善其身，評級當然同時下降。近年香港房價持續破頂，新一屆港府真係要搵多啲專才返嚟幫手，去協助香港經濟轉型嘅同時，亦要諗點可以去增加土地供應。