林作被細路考起

正式加入補習界，努力向「補習天王」之位邁進嘅林作，不但主攻中學生市場，就連小學生都唔放過。早前，觀塘天主教佑華小學喺學校搞咗個「小記者」活動，林作就獲得該校邀請擔任嘉賓，接受一眾「小記者」嘅圍訪。

當日，林作準時現身學校，而一班「小記者」初時都表現得怕怕醜醜，但都鼓起勇氣輪流向佢發問。即使大部份嘅問題都好正經，不過有啲都幾刁鑽兼抵死，譬如：有小朋友竟然問林作個名係乜意思？好彩林作有備而戰︰「係嫲嫲改嘅，話算命計過，啲筆劃利我。我兩個同父異母嘅妹妹都係跟『作』字輩。」

到活動尾聲，見老師送完感謝狀同全體大合照後，班「小記者」呢個亦都熱晒身，仲同林作拉近晒距離，拎住本記事簿出來叫佢簽名，簽完中文又要英文，有啲仲話要日文添，繼而又問佢點解要咁樣簽名？古靈精怪主意多籮籮，令林作哭笑不得，差啲被考起。短短一粒鐘，不僅「小記者」玩得開心，連林作都話︰「第一次被小朋友訪問，好有意思！」

日前，林作獲邀到學校任嘉賓，接受十多名小學生「記者」訪問，佢哋嘅問題唔似平日嘅娛樂記者，林作都大讚新鮮有趣。

林作原來係左撇子，面對一眾「小記者」要求簽名，佢當然逐一滿足。

一班「小記者」完成訪問後，即刻生猛返晒，高舉V字手勢與林作影大合照。

正經又得，玩又得嘅林作，早前喺節目扮女人，十分搞笑。