詹瑞文囡囡就讀「偷拍名校」

近日，名校聖士提反書院偷拍事件轟動全城，據悉有七名高中男生，疑舊年九月開始喺校內多個地方，用針孔鏡頭偷拍女生換衫、沖涼，再將幾十條片上載到雲端公諸同好。事件被揭發後，校方報警處理，涉事學生已被拘捕及即時停學，校方又成立小組調查事件；而年紀最細嘅受害者只係讀中二咋，諗起都得人驚。

東姑數數手指，查實有唔少名人同明星都係該校嘅校友，包括：森美、袁彌明、何廣沛、鄧肇堅爵士、鄒文懷、吳光正等，可謂人才輩出；而o依家讀緊嘅，就有詹瑞文同前妻甄詠蓓個女詹樂童，以及吳若希個細佬。東姑就事件向甄詠蓓了解一吓，佢就話個女讀緊中一，未有出事，自己就好欣賞學校處理得夠果斷、夠快，除咗早前發信交代事件之外，事件被揭發後嘅首個上課日，校方又嗱嗱聲開咗個特別早會，向學生解釋番件事，自己放心畀個女繼續讀落去。

除此之外，甄詠蓓都有同乖女做心理輔導，分析番校方今次嘅處理手法，又灌輸男女有別嘅觀念畀佢，「我個女仲細，有需要指導吓，佢爹哋（詹瑞文）都應該有慰問佢。我同佢講起碼呢件事上，知道底線係乜嘢，唔好同啲男同學玩到樂極忘形。作為家長，我當然希望佢哋（涉嫌犯案者）唔係存心犯案，希望呢件事唔好再加深社會對佢哋嘅壓力，佢哋已經得到應該有嘅教訓。」東姑都希望事件可以快快告一段落，還小朋友一個寧靜嘅學習環境。

上周一，聖士提反書院被爆有學生涉偷拍，因該校嘅校風向來良好， 故消息傳出後轟動全港。

詹瑞文與前妻甄詠蓓嘅愛女詹樂童，現就讀聖士提反書院嘅中一，甄詠蓓透露佢有借偷拍事件教導乖女箇中嘅道理。

詹樂童（中）喺校內都算活躍，擁有幾多朋友仔，而媽媽甄詠蓓就事件都有教佢點保護自己。

直資名校嘅聖士提反書院，森美、何廣沛同袁彌明都係該校嘅校友。