黃翠如慳家BB

黃翠如有個上市公司老竇黃永華，黃爸爸旗下嘅土木工程公司聯旺集團（8217），舊年喺創業板上市後，翠如BB就搖身一變成為億萬千金，真係打跛腳都唔使憂。不過，佢就完全冇因為老竇身家暴漲，亂咁使錢，日前東姑就親眼見證到佢嘅慳家大法。

日前嘅朝早，東姑去咗《溏心風暴3》嘅開鏡禮見到翠如BB，佢着咗一件直條恤衫加一條半透明黑色半截裙，條裙若隱若現，所以留下深刻印象。而當日嘅夜晚，東姑去《使徒行者2》嘅煞科宴，又見到翠如BB。東姑發現佢又着返朝早嗰條裙，連鞋都冇換到，一裙兩着，真係慳家BB。

另外，東姑發現同場嘅袁偉豪，當晚嘅衣着有啲騎呢，上身着咗好man嘅迷彩，下身竟然着咗對粉紅色布鞋，加對灰色襪仔，呢啲算唔算係觀音頭掃把腳呢？

早上《溏心風暴3》嘅開鏡禮，翠如BB着咗條半透明嘅半截裙，若隱若現好性感。

而夜晚嘅《使徒行者2》煞科宴，翠如BB上身換咗衫，但係下身嘅半截裙，就同朝早一模一樣。

袁偉豪上半身着咗迷彩外套，本來型格十足，但係佢突然襯一對粉紅色布鞋，呢個配搭超奇特。