特首選戰 林鄭坐七百望八百
特首跑馬仔轉入直路，手執五百八十張提名票強勢入閘嘅前政務司司長林鄭月娥，以及主打民望牌希望突圍嘅前財爺曾俊華，被喻為呢場選戰嘅頂頭大熱。
喺剛過去嘅提名戰，港九區議會、勞工界、香港中國企業協會等親建制嘅界別，以及泛民，共約二百七十人無提名任何參選人，佢哋嘅取態足以左右大局。
有政界人士相信，呢班人當中有三分之二人會喺正式投票時，投票畀林鄭，「即係差唔多百八票，加埋林鄭本身嘅提名票，佢有望『坐七百、望八百』當選。」
消息人士透露，林鄭希望得到不同政治光譜嘅選委認同，正積極向溫和泛民拉票。「教育及社福界嘅泛民選委較有機會撐佢，所以你見佢嘅教育政綱有唔少着墨，近排佢仲積極參加社福界選委嘅論壇。」
由於投票採用暗票形式，外界有傳部分提名林鄭嘅建制選委，到正式投票時會轉投曾俊華，但消息人士分析：「『倒戈論』只係曾營嘅心理戰術，目的係動搖奶粉嘅信心，仲要搞到有意轉軚嘅選委覺得倒戈有作為，而且咁多人轉軚好難查出邊個作反，其實通通係煙幕，真正想轉軚嘅選委唔多。」
除咗心計，經常有風聲指有人想爆林鄭黑材料，但遲遲爆唔到好爆嘅材料，反而花邊笑料有一則。早幾日就有傳林鄭為選特首放棄家庭，更傳出佢老公林兆波收埋一位「紅顏知己」。
一向顧家嘅林鄭即時激動回應，「如果有人唔想我選，可以批評我嘅政策，但點解要咁惡毒話我放棄家人？」林兆波亦主動為佢拆彈澄清，表明從來無做對唔住太太嘅事，仲自爆近排「晚晚都同老婆食飯」。隨着開閘日子愈來愈近，抹黑行為或者愈爆愈多，相信真係要「好打得」先招架得嚟。
至於曾俊華嘅選情，除咗要睇林鄭，仲要顧埋另一位候選人退休法官胡國興（胡官）。一向胡官畀人印象都係落場陪吓跑，外界總覺得佢係「鬍鬚B隊」，若果跑跑吓覺得佢會曾俊華票，泛民唔排除會仿效立法會選舉咁中途要佢棄選，力保曾俊華。
不過，經過提名戰一役，呢個如意算盤似乎未必打得響。胡官初時打鑼咁話唔夠票入閘，但當曾俊華交咗提名後，仍有意繼續拉票交更多提名表格時，胡官鬧曾俊華「損人不利己」，兩人嘅矛盾開始浮現。誰不知最後胡官交嘅提名表格仲多過曾俊華。
雖然「民主300+」上周六開會後，話會一致投票畀民望最高嘅一位候選人。不過消息人士表示，呢種「造王」策略只係部分泛民一廂情願嘅想法，其實唔少泛民選委堅持唔會投票畀曾俊華等建制派人物，在三名候選人之中，佢哋情願畀票胡官，或投白票。有泛民選委擔心，胡官愈跑愈起勁，會同曾俊華攬炒，選情更添變數。
曾俊華（左）與胡官同時靠泛民票入閘，有分析認為兩人有機會攬炒。
以五百八十張提名票強勢入閘嘅林鄭，有望劍指超過七百票當選。
曾俊華未肯迎戰出席民主思路嘅論壇，三缺一之下，只有林鄭（左）與胡官針鋒相對。
近日不少關於林鄭老公林兆波（左一）嘅煲水新聞，已被林兆波一口否認。
