生活煩惱多，最好就係以笑聲中和，即將喺三月十六號上映嘅《我老婆未結婚》，係近年少見嘅喜劇小品，今次「Paco巨星飯堂」，就邀請身兼電影嘅編劇、監製及演員嘅林熹瞳（Rachel）、周俊偉（Lawrence）同張文慈（Pinky），暢談呢部遠赴洛杉磯取景嘅喜劇。

我帶佢哋去到位於蘭桂坊嘅「Jinjju」，以特色嘅韓國fusion菜，率先慰勞三位嘉賓。

Rachel（中）先後同Lawrence（左）及Pinky（右）喺唔同嘅作品中合作，今次喺電影中再度攜手，發放笑彈。

身兼三職

繼一五年喺唔同影展屢獲殊榮嘅《我們停戰吧！》後，Rachel喺新戲中再次身兼編、監、演三職，而且佢仍然係樂在其中。「今次嘅戲種同上次好唔同，上次比較嚴肅啲，今次嘅古仔係喜劇，有啲笑中有淚嘅。我就飾演一個彈唔起嘅o靚模，因為同男朋友有啲誤會，一怒之下就去咗美國，做艾威嘅出租老婆。

「戲名叫《我老婆未結婚》，就係因為我只係扮佢老婆啫，原因係佢真正嘅老婆，即係Pinky因為創傷後遺症而失憶，但艾威又要搵人呃佢阿媽，所以就喺網上bid咗我嘞！」

Lawrence飾演Rachel「元配」男友，後者以「高富帥」去形容拍檔喺戲中嘅角色，Lawrence就話：「係富二代嚟嘅我個角色，而且我都好耐冇演過喜劇，講對白嘅節奏同動作，都同演其他戲唔同，而我同Rachel之前因為拍旅遊節目合作過，所以默契方面都OK。係我嘅角色只負責香港嗰part，冇得去L.A.咁啫。」

我同三位嘉賓去到位於蘭桂坊嘅「Jinjju」，品嘗特色嘅韓國fusion菜。

今次Rachel施展渾身解數去搞笑，從肢體動作就見到佢下過苦功。

電影曾赴洛杉磯取景十二日，期間張松枝（左三）生日，Rachel、黃文慧、艾威（左至右）同Pinky（右一），仲為佢搞surprise party。

脆炸蝦球棒棒（$100），彈牙嘅蝦球，點埋韓式辣椒蛋黃醬，yummy！

韓國餃子（$85），共有三款口味，圖中所見為肉餃，餡料為豬肉及牛肉，配上餐廳自家製嘅黑醋醬汁，提升味覺享受。

荷李活Mode

哈哈哈！鬼馬嘅Lawrence仲擺出一副羨慕表情，令Rachel即時補鑊：「我哋喺洛杉磯拍咗十二日啫！你喺香港好重要o架！」

屬於「美國部隊」嘅Pinky，就一臉回味。「呢部戲係我從影以嚟，拍得最開心嘅一部！除咗因為去洛杉磯取景，我仲可以喺過程中，見識到美國啲crew點樣做嘢，佢哋做嘢有制度，而且連食飯都同我喺香港好唔同，每次都排得好大陣仗，好似buffet咁，我會覺得好備受重視。

「而拍檔就個個都咁nice，我最深刻係拍一場我同艾威喺河邊踩單車嘅戲，我哋係踩雙人單車，睇落去好似好浪漫，但其實我哋都練咗一陣，先可以做到嗰種feel。」

Rachel同Pinky都好欣賞美國工作人員嘅專業，後者亦懷念喺洛杉磯取景嘅日子，「好似真係去旅行咁！」

Pinky飾演艾威嘅失憶妻子，踩雙人單車呢幕，係佢嘅特別推介。

電影喺美國取景時，跟足荷李活製作嘅制度，其中令Pinky最難忘嘅，就係自助餐式午餐。

K-Pop Pornstar（$140）係一杯混合酸甜味嘅雞尾酒，一邊係熱情果加雲呢嗱及菠蘿汽酒（左），一邊則係甘桔燒酒。

Lychee Lover（$120）係荔枝燒酒加上意大利葡萄汽酒，味道較甜啱女士。

首演同志

新戲即將上映，三位嘉賓喺興奮以外，都分別投入其他工作。Pinky就正為TVB劇集《深宮計》拍攝，「我喺劇入面係飾演同司膳房有關嘅角色，觀眾真係要期待！」

Rachel就為其他電影進行籌備工作，「希望喺五、六月左右可以開拍其中一部，今次我會拍驚慄懸疑嘅戲種。」

至於Lawrence就為自己嘅演藝事業帶嚟突破，「o依家我為港台拍緊個單元劇，叫《租客的衣櫃》。我喺劇入面飾演一個同志，係我從演以來嘅第一次。有啲朋友同我講，我先知自己喺同志界都幾受歡迎，真係要多謝佢哋嘅眼光！哈哈！」

Lawrence近期挑戰自己嘅演技，從演以來首次飾演同志角色。

韓式炸雞（$680），選用嚟自澳洲嘅走地雞，即叫即炸，脆卜卜嘅外層包住juicy嫩滑嘅雞肉，令人難以抗拒。

燉USDA牛仔骨（$330），入口即溶。

和牛迷你漢堡（$140），嫩滑嘅和牛加上秘製香料同辣泡菜，層次感豐富。

五花腩墨西哥夾餅（$135），燒得惹味嘅五花腩加上辣泡菜，韓系餡料配上墨西哥外殼，極具特色。

Jinjju
地址：香港中環德己笠街32號UG樓
電話：3755 4868