吳君如鍾情觀塘商廈 六年升值一倍

內地澧沅弘金融集團收購志昇證券之後，在香港成立Fortune Fountain Capital Limitied，上周開幕典禮竟找到吳君如身影？原來其母是志昇老客戶，自己部分投資亦由志昇負責，「阿媽派我來支持吓，佢跟開呢度一個經紀，我都係跟阿媽玩吓！」吳君如笑說。

不過，吳君如自言極少炒賣股票，屬極穩陣派投資者，多數持有藍籌及磚頭。問她有何投資心得，她大笑︰「無o架，邊有時間坐喺度短炒，有呢啲運都用來拍戲好過。我信磚頭多過信股票，穩陣好多！」

講起投資磚頭，吳君如和陳可辛兩公婆的確有一手，翻查記錄，兩人以公司名義於一一年七月，合共以約三千三百萬掃入觀塘萬兆豐中心兩個寫字樓單位，該兩個單位現時估值合共已高達近七千萬，持貨不足六年暴升一倍有多，相當和味。

兩人亦同時持有萬兆豐中心一個車位，一二年僅以八十六萬買入，現時市值已達一百七十萬元，同樣幾近翻倍。

投資有道，是否會留給女兒做嫁妝？她說︰「我咩都係留畀佢o架啦！依家開始幫佢儲錢，來緊會買吓基金，不過唔會同佢講，我驚佢之後會被男仔呃晒啲錢啊！」

上周Fortune Fountain Capital開幕，吳君如（右二）親自到場支持，她坦言自己是穩陣派投資，愛磚頭多過股票。

吳君如及陳可辛兩人以公司名義持有觀塘萬兆豐中心兩個寫字樓單位及車位，不足六年，已升值超過一倍。

吳君如及陳可辛愛女陳是知（前）今年已十歲，吳君如稱有幫愛女儲錢買基金，希望長大後有個錢傍身。