陳冠希家姐晒甜蜜蜜
最近盛傳陳冠希﹙Edison﹚就嚟做人老竇,似乎呢隻冇腳嘅雀仔,終於肯停落嚟唞一唞,咁同佢一樣緋聞多多嘅家姐陳見飛呢?
一〇年,陳見飛宣布同飲食才俊Eric拍拖,男友家住淺水灣豪宅,出入以五十萬勁辣跑車代步,堪稱「筍盤」。拍拖未夠一年,陳見飛即冧掂男友開餐廳,仲話希望趕到第二年嘅夏天做少奶奶。當年佢仲同東姑講:「以往啲男友,Edison冇個鍾意,o依家佢同我男友傾偈多過我。」所以,佢鐵定咗伴郎係細佬陳冠希。最後,當然婚就結唔成,陳見飛仲換咗好幾個男友添。
最近,陳見飛又公開放閃,上載咗好多同新任男友Thomas Chan嘅恩愛甜蜜相。佢兩個拍咗半年拖,影相嗰陣玩咀嘴,又扮鬼扮馬,重點係Thomas一樣冧得掂陳冠希。其實,Thomas係溫哥華嘅華僑,同陳見飛成家人一樣鬼聲鬼氣,所以特別投契。
為咗等Thomas可以融入家中,陳見飛就成日孖住男友齊齊出席家庭聚會,當然識埋細佬陳冠希。
同男友外遊,陳見飛當然大解放,三點式上陣同陽光玩遊戲。
喺男友Thomas身邊嘅陳見飛,特別小鳥依人,笑得好幸福。
陳見飛同Thomas既恩愛又甜蜜,咀住影相,仲要上載到社交網。