平庸之惡

近年「平庸之惡」這個概念，慢慢多些人認識，但其實它表達的已是七十多年前，二次大戰中集中營的共犯心態。

在納粹黨集中營工作的看更、保安員就算明明知道當中殺人無數、虐待人無數，也深深認為自己沒有任何責任需要負，認為自己只是聽命工作，沒有直接殺人、害人！當然，盟軍及猶太人組織並不這樣認為！知情、容忍、包庇、甚至輔助工作，就是共犯，這等人便是平庸之惡！

話說在二○一七年二月七日晚上七時多，陪老爸在尖沙咀緬甸台吃過飯後，便散散步，來到彌敦道金馬倫道口，看見一排私家車、七人車等等泊在馬路邊當私家停車場，連司機也欠奉！更甚者，有人在空位放上三件雜物，預先霸位！

這種非法情況，非常少見！最不可思議是，前面隔兩個車位就已經有架警察衝鋒車停在路邊！

對不起，我實在多事，走上前跟坐在司機位的高級警察講：「後面一排非法泊車，點解你哋唔做嘢？！」好坦白講，如果醒目的，說句：「好！我o依家call人去做！」我便會轉身就走；但這位仁兄，一開始就不斷同我頂嘴！亦非常罕見！

他說：「你認為有需要趕車咩?!我認為冇需要喎！」

我：「咩話！咁即係你哋之前反違泊大行動之後就咩都唔做！」

警：「咁你認為有冇阻住交通行駛呀?!」

我：「我頭先喺緬甸台，就見到你啲同事去拖一架車走！嗰度都冇阻交通行駛o架！」警：「先生！你知唔知緬甸台咩事先！」我：「唔知喎！你講來聽下吖！」警：「嗰架係通緝車，所以要拖！」

我：「咁你後面成排車冇人去檢查，你點知冇另一架通緝車呀！」

他呆咗一呆，然後說：「呢個時代係咁o架啦！度度都違例泊車o架啦！我哋有衝鋒車自己工作，其他嘢唔到我哋做！」

我：「我又唔係叫你做，我只係要求你call center啫！」

警：「若果你堅持有需要，我咪call囉！」之後佢好晦氣地用自己手機叫同事做！

我說：「你都幾得意o架喎！」他即時回我一句：「你得意啲！」

我之後跟他講：「咁你做警察做乜啫！冇責任心又冇熱誠！」我離開兩步，佢就回馬槍串我：「多謝你訓示喎！」我於是慢慢行返去警車車窗！我話：「我都識唔少警察係有使命感嘅！好似你咁嘅attitude，做咩入職啫！」

我行開兩步佢再回馬槍一句：「多謝你訓示喎！」他就是要個下馬威！

之後我去書局買書，半個多小時後返現場，違例泊車及阻礙物仍在！衝鋒車早已走了！即是說，高級警察致電同袍也是裝出來的！……那時站在街頭，就想起「平庸之惡」！