黃玉郎 美人魚冧女

漫畫家黃玉郎，雖然年屆六十六，但畫功了得，冧女話咁易。早前頂替咗特首女梁齊昕，擔正電影《男極探射燈》「女一」嘅楊子瑤，剛喺上月底慶祝生日。身為前輩嘅黃玉郎，唔單止親自到場祝賀，仲幫佢畫咗幅Q版美人魚畫，更用埋呢幅畫訂造咗個生日蛋糕，相當有心思，冧死女！

壽星女楊子瑤同東姑講︰「我細個時做model，識咗黃百鳴同黃玉郎，今年收到黃玉郎呢張Q版人像畫，好得意。（你個Q版身材唔係好突出噃？）哈，太誇張就唔真實。嗰晚生日會收到好多禮物同利是，最貴嗰封有成一萬五千蚊，足夠過肥年。」至於生日願望就係工作順利，佢話稍後會北上拍電影，o依家要開始睇劇本，玩完就要開始工作。

當晚，一大班人喺酒店食飯及唱K，幫楊子瑤慶生，盡興玩到凌晨。

黃百鳴同黃玉郎兩位前輩，畀面到賀，出錢又出力，令到楊子瑤四萬咁口。

打扮年輕嘅黃玉郎，身穿白色外套，拎埋幅Q版美人魚畫送畀壽星女楊子瑤，誠意十足。