香港地寸金尺土，與其買劏房咁細的新樓，倒不如買舊樓，寬敞又實用。

「港產陀飛輪」萬希泉創辦人沈慧林（William）就深明這個道理，去年與從事銀行業的太太陳曦婷（Rachel）豪擲八位數字，購入港島區一層千五呎舊樓，再花半年時間，用過百萬元重新裝修，日日可對住個無敵維港海景，又點會捨得唔返屋企？

「呢度成廿幾年樓齡，買番嚟時出面爛熔熔，入面好殘舊，水喉都唔work，就連外牆都被遮蓋住，睇唔到海景，正常人都唔會睇中。但我知道呢度格局好靚，夠晒四正，空間感好大，畀人感覺唔止千五呎，似二千呎多啲，舊樓就係有呢個好處，以呢個呎數，真係好抵買！」

兩人最愛坐在U形牛皮大沙發上，觀看一百八十度維港海景，沈慧林說：「呢度低層，坐喺沙發o岩o岩好可以對住個海，高層就只可以望住個天。」

老婆話晒事

安樂窩不需要豪華，最緊要夠簡潔舒服，沈慧林直言貪新屋面積夠大，不但可以望住一百八十度維港海景，地點又方便，一舉三得。「我由細到大都住喺呢區，住咗三十年，以前我住隔離座，屋企人住樓上，好多細個嘅回憶喺度。我唔係無睇過半山區，價錢都唔係差好多，但諗到太太日後要湊BB，揀屋最重要都係近我哋兩個嘅屋企人，方便照應，咁o岩呢度又放盤，夾晒天時地利人和。」

大事自己決定，小事就由太太話事，「我老婆鍾意創作，所有設計、裝修、擺設都係太太同外父搞掂，我冇乜話事權，只需要配合，隔離嗰個先係老闆！」坐在旁邊的沈太聞言即笑說：「佢淨係出錢就得，唔使出聲！你見我呢度無豪華嘢，全部都好簡潔，屋企整到好富貴或宮庭feel，住落都唔會放鬆，所以我選擇以白色同米黃色為主，連燈光都要昏黃色，睇落都舒服啲。而且每年聖誕、除夕、新年都會請家人、同事嚟開party，坐十幾廿人都冇問題，有時連假期都唔想出埠玩，寧願留喺屋企，享受家庭樂。」

為了環保，兩夫婦每年都會布置同一棵聖誕樹，「細細棵放喺屋企，睇落都骨子啲。」

不主張電視撈飯的沈太，喜愛浪漫氛圍，特地選擇昏黃燈光，閒時更可以來個燭光晚餐，享受二人世界。

沈太就連客廁都不放過，換上聖誕雪人廁套，增添節日氣氛，「親友嚟到見到都會開心啲！」