俏麗復活
TVB台慶劇《致命復活》熱播，今周就踏入結局篇，劇集嘅「Big Boss」固然係城中熱話，但一眾演員嘅落力演出，一樣功不可沒。今次「Paco巨星飯堂」，我就邀請咗劇中三位女將：朱晨麗、譚凱琪（Zoie）同何雁詩，放低劇中嘅沉重氣氛，回復佢哋俏麗本色！
我帶三位嘉賓去到位於觀塘嘅「Dreamix廚」私房菜，品嘗特色嘅中國菜外，亦暢談劇裏劇外嘅二三事。
喺TVB台慶劇《致命復活》中，何雁詩、朱晨麗同譚凱琪（左至右）都相當搶鏡，今次佢哋擔任我嘅嘉賓，可以卸下劇中嘅沉重，重現俏麗一面。
多謝安仔
踏入結局周，朱晨麗雖然唔肯劇透，但佢話首次飾演企業顧問女強人，係對佢演技嘅一個大挑戰。「因為未試過做公司高層，開拍之前都有參考一啲真正嘅高層，仔細觀察佢哋每個動作、眼神同語氣，希望有一種管理層嘅霸氣，說服到觀眾。」
由朱晨麗演繹嘅「Queenie」，令佢首度獲提名角逐「最佳女配角」，但佢話以平常心面對，「觀眾願意去追、去講，已經贏咗口碑。反而安仔付出咗好多，又減咗廿幾磅，好值得我哋學習。何況我（Queenie）咁愛佢，無理由唔投畀自己鍾意嘅人。
「今次安仔教咗我好多嘢，尤其係有一場kiss戲，我咁記得係因為嗰場戲係喺情人節嗰日拍，我都有啲緊張o架，但係佢好好，喺現場會緩和氣氛，令到我冇咁緊張，好快入戲。」
有傳媒指朱晨麗有機會係劇中嘅「Big Boss」，當事人立即封口，反而Zoie放水表示：「我喺劇中嘅角色Emma，喺安仔失蹤之前都未識佢，咁你話有冇可能係『Big Boss』？」
我帶三位嘉賓去到位於觀塘嘅「Dreamix廚」，品嘗有heart又有水準嘅中式私房菜。
喺越南拍攝外景期間，朱晨麗（左）同阿詩（右）經常同拍檔之一嘅陳庭欣（中），出巡搵美食。
拍攝期間，朱晨麗話喺情人節當日，同安仔拍攝接吻鏡頭係自己最難忘嘅場景。
餐廳提供嘅私房菜套餐，價錢由$350-$688一位，不設加一服務費、開瓶費及切餅費，但必須兩日前預約，詳情可致電餐廳查詢。今次我哋品嘗嘅菜式，包括呢個前菜醉香南非鮑魚，酒香更襯托出鮑魚嘅鮮味。
杏汁豬肺湯係我嘅最愛，啱晒冬日潤肺。
Dreamix雙喜（黃金蟹盒＋酥炸生蠔），皮脆內鮮，甚具層次。
拍出感情
Zoie喺劇中一場「裸奔」戲，亦為佢搶咗唔少風頭。「嗰場戲都係我喺成套劇入面，最難忘嘅一場。我哋喺越南拍嘅，講我畀阿詩整蠱，於是個bikini top就甩咗。拍嘅時候成隊crew都試咗個效果，浩信又同我就晒位，所以我拍得好放心。真正埋位嘅時候，兩take就OK，我覺得係一個團隊合作嘅成果。」
阿詩嘅角色，喺呢套氣氛咁沉重嘅劇集入面，作出一個平衡。「我同泰臣都係劇入面比較輕鬆嘅角色；難忘嘅事好多，喺越南拍外景嘅時候，我同朱晨麗、陳庭欣，仲有一啲工作人員，唔使開工嘅時候就去搵好嘢食，即刻friend晒！其實之前我同朱晨麗已經喺另一套劇《味想天開》合作，所以拍《致命》就令我哋更加friend，仲試過開廠飲番兩杯添！」
朱晨麗一劇接一劇，仲憑《致命》獲得台慶頒獎典禮嘅「最佳女配角」提名，係實力嘅肯定。
展望二O一七，唱家班出身嘅阿詩準備推出新專輯，以好音樂會知音。
昌媽媽炆豬肉係另一家常菜，豬肉選用五花腩附近嘅玻璃腩，肉質更嫩；唔講唔知，朱晨麗對呢道菜讚不絕口。
葉婆婆冬瓜係老闆Sindy嘅家庭菜，冬瓜片間夾上金華火腿，清甜中帶甘香。
展望17
三位靚女喺周日舉行嘅《萬千星輝頒獎典禮》都有份角逐獎項：「最佳女配角」有朱晨麗同Zoie；阿詩就係「飛躍女演員」，佢哋異口同聲表示：「獲獎係一個好大嘅鼓勵，但係今次冇攞獎嘅話，嚟緊就更加有動力去做好啲。」
一六年即將過去，展望一七年，三位嘉賓都有新計劃。阿詩興奮表示：「始終我係唱歌出身，所以一七年我會喺樂壇出擊，出新歌出新碟，做好音樂畀樂迷聽！」
Zoie就話：「o依家我同朱晨麗拍緊新劇《平安谷．逐個捉》，希望一七年有唔同嘅作品，畀觀眾睇到我唔同嘅一面啦！」
朱晨麗就希望作多啲嘗試，「我想畀觀眾知道，朱晨麗可以係大反派，亦可以係醜女，唔同嘅另類角色都可以。所以我希望，喺一七年做多啲好角色畀大家睇。」
Zoie憑《EU超時任務》嘅出色演出，亦有份角逐「最佳女配角」獎項。
Zoie同阿詩都話，王浩信同泰臣係不可多得嘅好對手。
以精選普洱茶葉同玫瑰花茶炮製嘅茶香煙燻雞，既香又嫩滑。
百花蜜脆鱔係另一道值得推介嘅菜式，脆皮下嘅鱔肉相當juicy，令人愛不釋口。
蟲草花上湯浸時蔬，為整個飯敍嘅平衡菜式。
甜品係有機棕櫚糖奶涷 （不定期供應），清甜軟滑。
Dreamix廚
地址：觀塘觀塘道404號時運工業大廈11樓E室
電話：2668 2480 / 93003141
