敗訴孭幾百萬訟費　梁頌恆疑急搵工

青年新政梁頌恆及游蕙禎上周被高等法院裁定議席自十月十二日起無效後，議席即時懸空，令梁、游成為史上最短命的「十二日」議員。負責審此案嘅法官區慶祥仲判梁、游要支付政府八成訟費，粗略估計埋單最少幾百萬。為了「撲水」，青政發起眾籌，但疑因涉及「助訟罪」，帳戶被凍結，議席、錢財凍過水，本刊更發現梁頌恆疑似搵緊工。

先估算梁、游承擔嘅政府訟費，政府聘用資深大狀余若海及莫樹聯打呢單官司，據法律界中人估算，「佢哋接政府case，一向會收順啲，但估計兩個加埋最少都二百五十萬元。」至於分別代表梁、游嘅戴啟思及潘熙，同樣係資深大狀，有傳無一百萬酬金都請唔郁。就咁屈指一算，政府訟費打個八折，再加埋佢哋本身訟費，相信梁、游有可能孭成三百幾四百萬數。

青政梁頌恆（左）及游蕙禎不服議席被取消提出上訴，有機會令佢哋孭嘅訟費倍增。

除咗訟費，立法會預支畀梁、游設立辦公室嘅八十幾萬津貼，有可能要回水。

不過條數未計完，事關梁、游即晚決定上訴。梁頌恆估計，上訴要用五百萬元，佢聲稱會以眾籌方式籌集訟費。據青政網頁顯示，截至本周一，梁、游籌到近二十萬元，距離目標仲差好遠。但噩運總係接二連三，上周青政用作接收捐款嘅Paypal戶口突然被凍結，原因未明。有法律界人士認為或跟法律風險有關，「籌錢打官司，有助訟嫌疑，屬刑事罪行，雖然入到罪嘅案例少，但刑罰重，Paypal為免惹官非而凍結戶口亦算合理。」

如今，梁、游不單要孭起訟費，仲分別畀立法會追討八十萬元預支津貼。本刊上周二喺梁、游開記者會當晚，發現梁頌恆手持平板電腦，看似睇「貓紙」讀宣言，實質原來係Check電郵，熒幕所見佢頭九封來郵，竟然有六封跟搵工有關，部分標題寫住「高級營銷助理」等職位，莫非從政前做網上營銷嘅梁頌恆，已諗住搵工做番老本行？

梁、游家境一般，據悉梁頌恆自細喪父，母親獨力養大佢兄弟兩人。游蕙禎父親係水務署技術人員，月薪約四萬五，據悉早年已退休。母親係文職公務員，月入約二萬三千元，游父母早年喺旺角買樓，o依家市值四、五百萬，如果打輸官司，恐怕要四圍「撲水」先夠填氹。

游蕙禎父母早年喺旺角買樓，市值四、五百萬，如果打輸官司，恐怕賣樓都唔夠填。

本刊發現梁頌恆嘅郵箱，有多封跟搵工有關嘅電郵，莫非佢已打定輸數搵定工？