車婉婉為B改習慣

自〇七年， 車婉婉接手咗亡母嘅餐飲事業後，已經甚少公開露面，一三年嫁埋畀游泳教練Johnathon，佢就更加養尊處優。計計下，婉婉今年都已經四十一歲，年紀都有番咁上下，所以佢哋決定生番個BB嚟調劑下。日前， 婉婉就公布有咗嘅喜訊，仲話老公好驚生女，至於係仔定係女？佢就話十二月先會去做產檢，到時再話畀大家聽。婉婉同東姑講最近為咗養肥BB，於是狂食嘢，以前從來唔會飲湯、食早餐，o依家全部都做，不過好易喊，試過無啦啦喊咗一個小時。

日前，東姑喺銅鑼灣見到車婉婉三人行，除咗老公之外，仲有一位長輩緊貼住佢行，全程似足保鑣咁護航。由於嗰日係星期日，人多擠迫，啲路人見到佢都忍唔住停低望下，令到婉婉顯得好唔自然，於是一路上，佢都捉到老公實一實，好驚畀人撞親個肚，緊張大師上身。

車婉婉雖然素顏出街，但係街上仍然有好多人認得佢，仲竊竊私語兼指手劃腳。

車婉婉腰肢粗粗，見佢不時要用手叉腰，似乎佗B佗得有啲辛苦。

日前，車婉婉自拍靚靚大肚照，並上載到微博與粉絲分享。