袁偉豪食榴槤搵命搏

〇七年嘅港男冠軍袁偉豪，喺無綫捱咗近十年，終於憑熱爆劇集《城寨英雄》嘅「牙佬」一角，打出一片天。喺劇中，佢一個打十多個，維持九龍城寨嘅治安，趕走一班惡霸，拯救寨中居民，簡直係眾人嘅偶像，而佢嘅功夫幾乎可以媲美「宇宙最強」嘅甄子丹！

雖然功夫好，但係飲食常識就肥佬囉。東姑就發現喺九月尾，袁偉豪同蔡思貝、張振朗、王君馨及姚子羚，去咗馬來西亞幫無綫做宣傳。難得，一班當紮小生同花旦都係榴槤愛好者，梗係要大擦一番，仲要送啤酒咁high添！不過，佢哋似乎忘記咗一樣嘢，就係榴槤同酒溝埋一齊享用，隨時命仔都冇埋。

雖然成班人食榴槤好開心，但係袁偉豪同張振朗都唔應該飲啤酒送榴槤，搵命博囉！

東姑喺度拋吓書包，因為人飲酒之後，身體就會分泌一種叫乙醇脫氫酶嘅物質，咁酒精先至會被分解，繼而排出體外；不過，榴槤則會抑制咗酶嘅作用；所以食完榴槤再飲酒，嚴重嘅話可能會引起酒精中毒。

相中所見，蔡思貝、王君馨同姚子羚就乖乖豬，食榴槤飲椰青；之但係，張振朗同袁偉豪就一邊隊啤，一邊歎貓山王，真正攞條命去搏，好牙煙！特別係袁偉豪事業先啱啱起步，應該要小心自己身體，免得女朋友岑杏賢擔心啦！

相信袁偉豪當時應該有所節制，唔算飲得多，所以安然無恙。

啱啱嘅九月尾，袁偉豪、蔡思貝、張振朗、王君馨及姚子羚，一班人去咗馬來西亞幫無綫做宣傳，順便去歎貓山王。

影大合照時，張振朗最識得搶鏡，難怪極速上位成為劇集嘅主角。

原來三位索女蔡思貝、王君馨及姚子羚一樣重口味，都係榴槤嘅愛好者。

袁偉豪亂咁食，唔識好好照顧自己，小心女朋友岑杏賢嬲嬲豬。