梁朝偉劈價益用家

「電眼影帝」梁朝偉（偉仔），演技一絕之餘，投資亦眼光獨到。佢喺九三年開始，已經投資物業，現時手執嘅六個物業，市值逾兩億，其中有一半冇做按揭，資金相當雄厚。而喺咁多年出售物業中，佢從來都未有損手，更屢有斬獲添；好似舊年年底，佢就以近八千五百萬售出One Island South嘅商廈單位，持貨三年，狂賺近二千三百萬，真係好過拍電影多多聲。

不過，喺兩年前，偉仔以四千三百幾萬，高位買入黃竹坑商廈W50嘅其中一個單位，暫時喺租金上就有啲損手，可能係因為南港島綫延遲通車，影響到附近嘅物業租售價。東姑睇到物業查冊，偉仔呢個W50嘅高層單位，面積近三千呎，佢只係以月租五萬六租出，呎租二十蚊；據該區嘅地產代理表示，偉仔劈租價近三成，搞到回報極低，只係得一厘半咋。據知，新租客係鉛筆生產商Faber-Castell，係有實力嘅公司，都算係搵到個好租客，平啲都冇乜所謂啦！

東姑再細心研究，發現偉仔所持有嘅六物業全部屬佢個人名下；而老婆仔嘉玲嘅名下亦都持有兩個物業，市值逾一億。睇嚟梁氏伉儷財政都幾獨立。至於，佢哋住緊嘅山頂獨立屋，市值成二億五千萬，因為由BVl（海外公司）擁有，唔知業權歸偉仔定嘉玲呢？總言之，佢哋所有物業加埋嘅總市值超過五億，富甲香港娛圈喇！

偉仔與嘉玲兩夫婦所有物業加埋嘅總市值超過5億，認真係富甲香港娛圈！

雖然偉仔投資眼光一直獨到，但喺兩年前，以四千三百幾萬買入嘅黃竹坑商廈W50一個高層單位，暫時喺租金上就有啲損手。

嘉玲喺九三年買入嘅中半山May Tower中層單位連車位，現已升值至八千八百萬，相當和味。

梁氏伉儷現時住緊嘅山頂獨立屋，市值成二億五千萬，因為由BVl（海外公司）擁有，唔知業權歸偉仔定嘉玲呢？