爆Hit老友記
現世代多娛樂，電視劇只係其中一項，但係TVB嘅《一屋老友記》，最近屢創收視佳績（最高31點），令劇中演員大多成為熱爆人物。我一向緊貼時代步伐，所以今次「Paco巨星飯堂」，就請嚟「細寶」張彥博同「星辰姐姐」劉佩玥（Moon），集人氣、話題於一身。
我帶兩位嘉賓去到位於天后嘅「16 Shell」，以意、美fusion菜式，同兩位年輕人慢慢暢談！
今次我帶近期人氣爆燈嘅「細寶」阿博同「星辰姐姐」阿Moon，去到位於天后嘅「16 Shell」，品嘗意、美fusion菜式之外，亦了解吓網民最愛嘅兩位新演員。
踏入結局篇
人氣劇集今周就踏入結局篇，阿博同阿Moon嘅網民支持度亦持續高企。劇中飾演宅男「細寶」嘅阿博，暗戀「仙氣女神」阿Moon，佢話：「不論戲外戲內，我都當阿Moon係女神o架！佢個性好爽、好man，我哋好易交流到。雖然我哋喺劇入面冇親熱戲，只係哄到好埋咁，未去到kiss，咁先襯番我喺劇入面嘅角色性格。」
阿Moon就笑言，自己同劇中角色完全唔似，「我覺得自己冇仙氣喎，更加唔係咩女神啦！阿博個樣仲靚過我啦！對眼又大、皮膚又好，真係輸畀你呀！（唔怕傳緋聞？）而且我覺得佢一彈琴或者結他，就超級專注，身邊所有嘢都睇唔到，成個人上晒身，好犀利！」
雖然年輕人喺劇中並非happy ending，但係佢哋都不忘答謝其他對手。阿博話：「我每場戲都好畀心機去做，做足準備工夫，因為我驚我做得唔好，會影響到其他人。」阿Moon補充：「呢套劇嘅台前幕後，所有人都好體諒我哋呢啲新面孔，真係要多謝佢哋。」
阿博同阿Moon憑劇集入屋，前者仲成為網民焦點。
黑炭黑蒜蓉包（$45），以黑蒜製作嘅蒜蓉包，夠晒健康。
鮮羅勒配意大利黑醋及水牛芝士（$88），帶酸嘅味道，係開胃嘅前菜。
白酒橄欖牛油煮蜆（$80），清香鮮甜。
各有新動向
《一屋》令兩位年輕人成為網民熱話，阿博初嘗成為焦點嘅滋味，同時已經投入新工作。「o依家我為古裝劇《翻生武林》開緊工，好多時都開外景，所以曬黑咗啲。我喺呢套劇入面飾演道士，劇透少少啦，我仲會同泰臣、蝦頭發展一段三角戀。」
阿Moon就直情劇接劇，佢有份演出嘅《城寨英雄》，將緊接《一屋》播出。「我喺新劇嘅角色同『星晨』好唔同，係一個千金小姐，因為發現佢嘅爸爸做好多犯法嘅事，所以離家出走。呢套劇個個都要打，陳展鵬、伍允龍都打到飛起，而我最後都要，仲畀人打咗幾鎚添！
「另外，因為我大學係讀電影嘅，所以我一直都有寫吓劇本，希望有一日我嘅作品可以拍到出嚟啦！」
阿博現正投入新劇《翻生武林》嘅拍攝工作，戲中飾演道士嘅佢，同蝦頭及泰臣最多對手戲。
今周係《一屋老友記》嘅結局周，但視迷喺下周同樣時間，一樣睇到阿Moon嘅演出，佢喺劇集《城寨英雄》中，飾演出走嘅千金小姐，劇接劇keep住人氣。
雖然阿博同阿Moon喺劇中保持距離，但私底下嘅佢哋，相當老友，飯敍嘅時候佢哋仲即席jam歌，氣氛一流。
餐廳老闆阿U（左一）係美國回流嘅專業人士，佢同霆鋒助手表哥等朋友合資開餐廳，個個都有heart！
揭童顏之秘
雖然阿博一副童顏，點都睇唔出佢喺十月就已經三十六歲，但係聽完佢嘅日常生活習慣，或多或少都會明白童顏背後嘅秘密。「我個人每日都好開心，呢個係最重要嘅，因為咁樣唔會焗住自己嘅情緒，放鬆啲，個人就會young啲。為咗消水腫，我日日都飲檸檬水，又可以補充維他命C。仲有！我最鍾意飲阿媽煲嘅愛心靚湯，有葛湯、清補涼，同keep到靚皮膚嘅魚湯！三管齊下，一定得！」
阿Moon仔細聽阿博嘅心得，全因：「我媽咪都叫我向你請教keep到咁young嘅秘方o架！（阿博：「你有冇啲去水腫秘訣share呀？」）有！偏方就話飲齋啡，我就覺得有啲削胃，所以就飲媽咪煲嘅薏米水同冬瓜茶，香港咁潮濕，要飲呢啲嚟祛濕。」
兩位嘉賓對保持童顏同護膚都甚有方法，而且佢哋仲以自己做人辦，我就祝兩位「靚肌（膚）」繼續喺演藝界發光發熱！
香煎鵝肝（$98/2件），外脆內rich。
香煎羊扒（$288/3件），羊肉外香脆內鮮嫩。
黑松露意大利燉飯配大蝦（$168），濃淡配合得宜。
是日鮮魚配欖油大蒜、驢蹄草及檸檬（$168），味道清新，啱晒夏日。
橄欖油、大蒜煎無骨雞髀配鹽醃鹹魚仔（$138），雞肉保持juicy。
16 Shell
地址：天后炮台山蜆殼街6-16號寶榮大廈地下B舖
電話：39545918
