林鄭百變旗袍show
政圈近期最熱話題，莫過於政務司司長林鄭月娥的新look。眼利的政界人士發現佢最近副眼鏡唔同咗，「以前係金屬邊眼鏡，最近改戴棗紅色嘅方形膠眼鏡，smart咗好多。」另一個亮點，就係林鄭嘅旗袍時裝騷，「佢呢兩個月，每次出席活動都係以旗袍示人，而且套套都唔同，一時藍色、一時紅色、黃色……仲襯埋一set耳環及頸鏈，化埋妝真係耳目一新。好靚。」政界人士讚歎說。
其實，林鄭早喺兩個月前出訪美國三藩市，已經引起外界注視佢嘅衣着，當時佢試過上下晝分別着兩套旗袍出席唔同嘅官式活動，好多外交官都覺得佢嘅打扮凸顯東方美態。
咁多旗袍戰衣，到底出自邊位師傅？本刊八到，原來林鄭幫襯開中環萬邦行一間旗袍店做衫，最近間舖頭負責人因為年老收山，但仍會在屋企接林鄭柯打，「林鄭喺嗰度做衫做咗十幾年，以前一年做七、八件，最近做密咗。」知情人士說。
知情人士話，林鄭鍾意設計簡單又大方的旗袍，仲話：「旗袍好啱林太呢類咁忙嘅女強人，度好身就以後都用呢個尺寸，做唔同布料嘅旗袍，唔使再親身上去度過身，好方便。」
政界亦有口痕友話旗袍有特殊意義喎，「佢係中國文化嘅象徵，旗袍穿出愛國情懷；佢係特首黑馬之一，所以都要穿出態度出來。」姑勿論旗袍係咪為特首「跑馬仔」鋪路，林鄭呢身打扮的確令人眼前一亮。著名時裝設計師鄧達智點評佢以前打扮太低調，近期品味突飛猛進，「有時佢加件外套，同旗袍長短比例恰到好處，色彩選擇也愈來愈鮮色，比以前搶眼好多。」
鄧達智又向林鄭教路，換副再粗框少少嘅眼鏡，對整體形象有幫助，「她嘅髮型簡單，幼框眼鏡顯得五官平凡，如果換番副粗框眼鏡相信會好好多。」
左一 立法會煞科前，林鄭一襲旗袍襯米色外套，艷壓全場。
左二 五月張德江訪港，藍白色旗袍既喜慶又大方。
右二 林鄭旗袍款款唔同，四月參與閩港合作會議，着套棕紅色旗袍相當奪目。
右一 出席行會會議，林鄭着條銀白色旗袍，端裝得嚟又搶眼。
